చ. |
చెలఁగుచు దైత్యసేనలు విశృంఖలవిక్రమలీల నేచి యు
జ్జ్వలవివిధాస్త్రశస్త్రరుచిజాలము పర్వఁ గడుం గడంక ముం
గల నడువంగ దానవుఁ డకంపితుఁ డై చను రాజనందను
న్నిలు నిలు మంచుఁ గూడఁ జని నిష్ఠురనాద మెలర్ప నార్చుచున్.
| 332
|
ఆ. |
చుట్టుముట్టి వివిధసునిశితాస్త్రములు పైఁ, గురిసెఁ గదిసి యసురకోటియును ర
యమునఁ దీవ్రసాయకాసిగదాశూల, తతుల నన్నరేంద్రతనయుఁ గప్పె.
| 333
|
ఆ. |
అట్లు దనుజవీరు లరవాయి గొనక త, న్భూరిశస్త్రవృష్టిఁ బొదువుటయును
నలఁతి నగవుతోడి యలుక మోమున కొక, చెలువొనర్ప శత్రుజిత్సుతుండు.
| 334
|
వ. |
గుణంబు సారించి మార్గణంబులు నిగిడించి.
| 335
|
శా. |
దైతేయప్రవిముక్తదారుణగదాదండాసినానాయుధ
వ్రాతంబు ల్విలసత్తదాభరణవర్మశ్రేణియు న్జూర్ణ మై
పాతాళైకనికేతనాంతరమునం బర్వంగఁ జేసె న్వెసన్
జాతామర్షత నక్కుమారుఁడు రణోత్సాహంబు దీపింపఁగన్.
| 336
|
సీ. |
చేసి సముల్లాసహాసభాసురతరవక్త్రుఁ డై యుజ్జ్వలత్త్వాష్ట్రబాణ
మసురవీరుమీఁద నతఁ డేసే నేసినఁ దజ్జాతదారుణదహనశిఖలఁ
గాలి చర్మాస్థికపాలముల్ చటచటధ్వనులతో నెంతయు వ్రస్సి తొరఁగఁ
గపిలమునీశ్వరువిపులకోపాగ్ని సాగరులు రయంబునఁ గాఁగినట్లు
|
|
తే. |
దగ్ధు లయిరి దానవులు పాతాళకేతుఁ, డాదిగా నొక్కవ్రేల్మిడి నంత విజయ
లక్ష్మిఁ గైకొని యమ్మదాలసయు దాను, దనపురంబున కరిగె ఋతధ్వజుండు.
| 337
|
మదాలసాయుతుఁ డగుకువలయాశ్వునిఁ దండ్రి గని యానందించుట
వ. |
అరిగి పరమభక్తిం దండ్రిచరణంబులకు నమస్కరించి తాను వరాహంబు నేయు
టను దానిపట్టిన పాతాళలోకంబున కరుగుటయుఁ గుండలం గనుటయు మదాలసం
బరిణయంబగుటయుఁ బాతాళకేతుప్రభృతిదైత్యులం జంపుటయు విన్నవించిన
బ్రమదాశ్రుకణకలితలోచనుండును బులకితశరీరుండును నగుచు నన్నరేశ్వరుండు
గువలయాశ్వుం గ్రుచ్చిలించుకొని.
| 338
|
ఉ. |
నెట్టన నమ్మునీశ్వరులు నిర్భయభావముఁ బొంద దైత్యులం
గిట్టి వధించి ధర్మమును గీర్తియు శౌర్యముఁ దేజము న్మొగుల్
ముట్టఁగఁ జేసి వంశము వెలుంగ జగంబులఁ లేరు గన్న నీ
యట్టిసుపుత్రుఁ గాంచుటఁ గృతార్థుఁడ నైతిఁ గుమార! యెంతయున్.
| 339
|
సీ. |
తండ్రిచే సంపాదితము లైనధనయశంబులు ప్రతాపము పొలివోవకుండఁ
దప్పక వర్తించుతనయుఁడు మధ్యముం డాత్మీయసత్త్వసామగ్రిఁ జేసి
తండ్రిమాహాత్మ్యంబు దద్దయుఁ దనరార నొనరించునందనుం డుత్తముండు
తండ్రిసద్గుణసముదయము ద్రుంగుడు వడ మెలఁగుపుత్రుఁడు హీనుఁ డలఘుశౌర్య
|
|