పుట:పంచతంత్రము (దూబగుంట నారాయణ).pdf/127

తే.⁠

రాజుచేత మహాగ్రహారములు వడసి, గుళ్లుఁ జెఱువులు వనములు గోపురములు సౌధములు మల్లెసాలలుఁ జప్పరములు, నంతిపురములు లోనుగా నమరఁ జేసి.

⁠ 13

సీ.⁠

గజనికేతనములు గట్టించి యన్నిఁట భద్రదంతావళప్రతతి నుంచి వాజిశాలలు గట్టి వరరూపజవసత్త్వసంపన్నవర్ణితాశ్వములఁ గట్టి పరశుపట్టసగదాప్రాసతోమరకుంతకోదండహస్తులఁ గూడ నేలి భేరీమృదంగగంభీరరావంబులు కలయంగ ముందటఁ జెలఁగుచుండ

⁠

తే.⁠

రత్నభూషణాలంకృతరమ్యగాత్రు, ననుదినంబును వాహ్యాళి కరుగునన్నుఁ జూచి బంధుజనంబులు చోద్యపడుచు, నెలమిఁ దమకన్నియల నాకు నీఁదలంప.

⁠ 14

క.⁠

కులమును రూపును గుణమును, గలకోమలిఁ బెండ్లియాడి కాయజకేళిం జెలఁగంగఁ బెద్దకాలము, జలజాక్షికిఁ జనుచునుండ సంతతిలేమిన్.

⁠ 15

తే.⁠

పెక్కునోములు నోమంగ భీతహరిణ, నేత్ర గర్భంబు ధరియించి పుత్రుఁ గాంచ నాఁడు నత్యంతసుకుమారవైభవమునఁ, బేరు సోమశర్మ యనంగఁ బెరుఁగుచుండ.

⁠ 16