ఈ పుట ఆమోదించబడ్డది
రేకు: 0108-06 సామంతం సం: 02-048 కృస్ణ
పల్లవి: అందరివలెనే వున్నాఁ డాతడాఁ వీఁడు
యిందుముఖులఁ గూడినాఁ డీతఁడానాఁడు
చ. 1: యిందరూ నేఁటేఁట జేసే యింద్రయాగపు ముద్దలు
అందుకొని యారగించినాతఁడా వీఁడు
చెంది మునులసతుల సతఁ దెప్పించుక మంచి-
విందు లారగించినాఁడు వీఁ డానాఁడు
చ. 2: తొలుత బ్రహ్మ దాఁచిన దూడలకు బాలులకు
అలరి మారు గడించినాతఁడా వీఁడు
నిలుచుం డేడుదినాలు నెమ్మది వేలఁ గొండెత్తి
యిల నావులఁ గాచినాఁ డీతఁ డానాఁడు
చ. 3: బాలుఁడై పూతనాదుల బలురక్కసులఁ జంపి
ఆలరి యాటలాడిన యాతఁడా వీఁడు
యీలీల శ్రీవేంకటాద్రి యెక్కినాఁడు తొలుతే
యేలెను బ్రహ్మాదుల నీతఁ డానాఁడు