ఈ పుట ఆమోదించబడ్డది
రేకు: 0117-05 మలహరి సం: 02-101 శరణాగతి
పల్లవి: కోరి మాభుజముల డాగులు మోచుకున్నారము
ధారుణిలోపల మమ్ము దయఁజూచుఁ గాక
చ. 1: సతతము హరిచేతి శంఖచక్రములే
గతియై మాపాలనుండి కాచుఁ గాక
అతిరయమైనట్టిఅచ్యుతుని ఆయుధాలే
హితవుగ మమ్ము నిట్టె యేలుఁ గాక
చ. 2: కమలాపతిచేతుల గదాపద్మములు
మమకారముతో మము మన్నించుఁ గాక
సమరవిజయమైన శార్ఙ్గాదిశరములు
తమితోడ మాకు దాపుదండై వుండుఁ గాక
చ. 3: ముంచి శ్రీవేంకటేశుఁడు మొలఁగట్టిన కఠారు
అంచెల మాకెల్ల రక్షై అమరుఁ గాక
అంచ నీతని కైదువులమరిన హస్తములు
పంచల మాకిట్టే వజ్రపంజరా లవుఁ గాక
