ఈ పుట అచ్చుదిద్దబడ్డది
రేకు: 0217-04 సాళంగనాట సం: 08-093 తేరు
పల్లవి:
కన్నులపండుగ లాయఁ గడపరాయని తేరు
మిన్ను నేల శృంగారము మితిమీరినట్లు
చ. 1:
కదలెఁ గదలెనదె గరుడధ్వజుని తేరు
పొదిగి దేవదుందుభులు మ్రోయఁగా
పదివేలు సూర్యబింబము లుదయించినట్లు
పొదలి మెరుపు వచ్చి పొడచూపినట్లు
చ. 2:
వచ్చెవచ్చె నంత వింత వాసుదేవుని తేరు
అచ్చుగ దేవకామిను లాడిపాడఁగా
ముచ్చటతో గరుడఁడు ముందట నిలిచినట్టు
మెచ్చుల మెరుఁగులతో మేఘము వాలినట్టు
చ. 3:
తిరిగెఁ దిరిగెనదె దేవదేవో త్తము తేరు
వరుస దేవతలెల్ల జయవెట్టగా
విరివిఁ గడపలో శ్రీవేంకటేశుఁడు తేరుపై
నిరవాయ సింహాసన మిదేయన్నట్లు
