ఈ పుట అచ్చుదిద్దబడ్డది
రేకు: 0217-01 దేసాక్షి సం: 03-090 కృష్ణ
పల్లవి:
కన్నవిన్నవారెల్లా కాకు సేయరా
వున్నతుఁడవైన నీకీ వొచ్చములేలయ్యా
చ. 1:
దేవతలఁ గాచినట్టి దేవుఁడ నీకుఁ బసుల
నీవలఁ గాచితివనే హీనమేలా
కావించి పాలజలధిఁ గాఁపురముండినయట్టి-
నీవు పాలదొంగవనే నింద నీకేలయ్యా
చ. 2:
కాలమందు బలి దైత్యుఁ గట్టివేసినట్టి నీకు
రోలఁ గట్టువడినట్టి రోంఁత నీ కేల
పోలించి లోకాలకెల్ల పొడవైన దేవుఁడవు
బాలుఁడవై రేపల్లెలోఁ బారాడనేలయ్యా
చ. 3:
పాముమీఁదఁ బవ్వళించి పాయకుండినట్టి నీకు
పాముతల దొక్కినట్టి పగలేలా
కామించి శ్రీవేంకటాద్రి కడపరాయఁడ నీవు
భూమి మాయలణఁచి నేర్పుల మాయలేలయ్యా
