ఈ పుట అచ్చుదిద్దబడ్డది
రేకు: 0212-06 గుజ్జరి సం: 03-072 శరణాగతి
పల్లవి:
వెఱ్ఱి మానుప రెవ్వరు వేఁదురు నాయంత విడువదు
ముఱ్ఱఁబాలలోఁ బుట్టిన ముంచిన వెఱ్ఱెయ్యా
చ. 1:
జగములు రక్షించఁ బాల్పడి సర్వేశ్వరుఁడే వుండఁగఁ
అగణితుఁ డాతనిశక్తి యల్పముగాఁ దెలిసి
జిగి నా సంసారరక్షణ సేసెదనంచునుఁ దిరిగెద
నగుఁబాట్ల యల్పుఁడ నే నావెఱ్ఱిదేయయ్యా
చ. 2:
అంతర్యామై దేవుఁడు అటు సుఖదుఃఖము లొసఁగఁగ
అంతయు మనుజులు సేసేరని నేఁ దిరిగితిని
బంతినే నావంటి జీవులబడిఁ దిరిగాడుచుఁ గర్మపు-
దొంతులఁ జిక్కిననా వెఱ్ఱితోడనే యిదేయయ్యా
చ. 3:
శ్రీవేంకటపతి యెదుటనే చేకొని వరము లొసఁగఁగ
దావతిపడి యితరుల నేఁ దగులుచు నడిగితిని
యీ వేళనే నా గురుఁడును యీ దైవము నిటు చూఁపఁగ
తోవెరిఁగిటు నే బతికితి తొల్లెల్ల వెఱ్ఱినయ్యా