ఈ పుట ఆమోదించబడ్డది
రేకు: 0288-03 దేవగాంధారి. సం: 03-508 వేంకటగానం
పల్లవి:
ఏమని నుతింతు నేను యిందిరానాయక నీవు
కామించి కోరినవారి కల్పలతవు
చ. 1:
నెట్టనఁ దలఁచేవారి నిండు నిధానమవు
పట్టినవారి చేతి బంగారమవు
చుట్టరికమెంచేవారి చోటికిఁ దల్లిదండ్రివి
ముట్టి కొలిచినవారి ముంజీతమవు
చ. 2:
సేవ చేసినవారికి చేతిలో మాణికమవు
భావించువారికి పరబ్రహ్మమవు
కావలెనన్నవారికి ఘన మనోరథమవు
వావిరిఁ బూజించువారి వజ్రపంజరమవు
చ. 3:
బత్తి సేసినవారికి భవరోగ వైద్యుఁడవు
హత్తి నుతించినవారి యానందమవు
పొత్తుల అలమేల్మంగ బువ్వపు శ్రీవేంకటేశ
ఇత్తల మా పాలిటికి నిహపరదాతవు
