ఈ పుట అచ్చుదిద్దబడ్డది
రేకు: 0209-01 దేసాక్షి సం: 03-049 భక్తి
పల్లవి:
నీవే నేరవుగాని నిన్నుఁ బండించేము నేము
దైవమా నీకంటే నీదాసులే నేర్పరులు
చ. 1:
వట్టి భక్తి నీ మీఁద వళుకువేసి నిన్నుఁ
బట్టి తెచ్చి మతిలోనఁ బెట్టుకొంటిని
పట్టెడు దులసి నీపాదములపై బెట్టి
జట్టిగొనిరి మోక్షము జాణలు నీదాసులు
చ. 2:
నీవు నిర్మించినవే నీకే సమర్పణసేసి
సోవల నీకృపయెల్లఁ జూరగొంటిమి
భావించొకమొక్కు మొక్కిభారము నీపై వేసిరి
పావనపు నీదాసులే పంతపు చతురులు
చ. 3:
చెరువుల నీళ్లుదెచ్చి చేరఁ(రె?)డు నీపైఁ జల్లి
వరము వడసితిమి వలసినట్టు
యిరవై శ్రీవేంకటేశ యిటువంటి విద్యలనే
దరిచేరి మించిరి నీదాసులే పో ఘనులు
