పుట:తాళ్ళపాక పదసాహిత్యం - మూడవ భాగం.pdf/486

రేకు: 0284-03 భూపాళం 03-484 ధనుర్మాసం

పల్లవి :⁠

ఏమి నిద్దిరించేవు యెందాఁకాను కామించి బ్రహ్మాదులెల్లఁ గాచుకున్నా రిదివో

⁠

చ. 1:⁠

పులుఁగాలుఁ బచ్చళ్ళు బోనము పెట్టినదిదే వెలయు ధనుర్మాస వేళయు నిదే బలసి సంకీర్తనపరులు పాడేరిదే జలజాక్షుఁడ లేచి జలక మాడవయ్యా

⁠

చ. 2:⁠

తోడనే గంధాక్షతలు ధూపదీపా లివిగో కూడిన విప్రుల వేద ఘోషణ లివే వాడుదేరఁ బూజించవలెఁ గమ్మఁబువ్వులివె వీడెమిదె కొలువుకు విచ్చేయవయ్యా

⁠

చ. 3:⁠

చదివేరు వైష్ణవులు సారెఁ దిరువాము డిదె కదిసి శ్రీసతి ముందే కాచుకున్నది. అదనాయ శ్రీవేంకటాధిప మా చరపిదే యెదుట నిన్నటిమాపే యియ్యకొంటివయ్యా

⁠