పుట:తాళ్ళపాక పదసాహిత్యం - మూడవ భాగం.pdf/440

రేకు: 0276-03 ధన్నాసి సం:03-438 నామ సంకీర్తన

పల్లవి :⁠

మెచ్చుల దంపతులార మీరే గతి మెచ్చితి నిన్నిట మిమ్ము మెరసె మీచేఁతలు

⁠

చ. 1:⁠

తమ్మిలోని మగువా వో ధరణీధరుఁడా మిమ్ము నే నమ్మితి నాకు మీరే గతి నెమ్మది నో యిందిరా నీరజలోచనుఁడా కమ్మి యే పొద్దును మీరే కలరు నాపాలను

⁠

చ. 2:⁠

పాలజలధి కూఁతుర భక్త వత్సలుఁడ హరి మేలిచ్చి రక్షించ నాకు మీరే గతి కేలి నో శ్రీమహాలక్ష్మి కేశవదయానిధి తాలిమి మీరే నాకు దాపు దండ యెపుడు

⁠

చ. 3:⁠

చెన్నగు రమాకాంత చెందిన వో మాధవ మిన్నక యేపొద్దు నాకు మీరే గతి చిన్ని యలమేలుమంగ శ్రీవేంకటేశుఁడా యెన్నికె కెక్కించి నన్ను నేలుకొంటి రిదిగో

⁠