రేకు: 0269-02 మలహరి సం: 03-396 అధ్యాత్మ
| పల్లవి : |
ఎవ్వరిదూరఁగఁ జోటు లేదు మరియేమనఁగలదిదివో తగవు
యివ్వల నందరి బడిబడిఁ దిరిగే యీకర్మముదే నేరమి
|
|
| చ. 1: |
నీ దాసులకును నేరమి లేదు నీవే గతియని వుండఁగను
ఆదినుండి నీకును నేరమి లేదఖిలానకుఁ గర్తవుగాన
పాదుపడక నడుమనుఁ దిరిగాడెడి ప్రపంచముదే నేరమి
యేదెస నొకచో నిజమేరుపడక యిటువలెఁ దిరిగాడెడిఁ గాన
|
|
| చ. 2: |
పాపము లేదిదె యజ్ఞానులకును భావమెరంగని పశువులు గాన
మోపై సుజ్ఞానులకునుఁ బాపము మోవదు నినుఁ గొలిచిరి గాన
చాపలముగ నమ్మించి చెరుచు పలుచదువులదే యీ పాతకము
పైపై నొకయర్థ మేరుపరచక భ్రమయఁగ వాదము వెట్టెడిఁ గాన
|
|
| చ. 3: |
యీలోకులకును అధర్మము లే దిన్నియు నీచేఁతలే కాన
మూలనున్నముక్తులకు నధర్మము మొదల లేదు నీ కృప గనక
కాలము గడపుచు నీవు రచించిన కపటపు మాయదే అధర్మము
అలరి శ్రీవేంకటేశ్వర య(యె?)క్కడనడ్డము తానేవచ్చీఁ గాన
|
|
