రేకు:0265-02 మలహరి సం: 03-373 శరణాగతి
| పల్లవి : |
నీకెటు వలసె నటుసేయి నీచిత్తము నా భాగ్యము
యేకడనైనా లక్ష్మీకాంతుఁడ ఇదియే పో నా విన్నపము
|
|
| చ. 1: |
నాగుణములే యెంచితినా నరక కూపములు చాలవు.
ఆగతినే నాకర్మములూ అనుభవించి తీర్చెనంటే
నీ గుణములే యెంచితివా నిఖిలసంపదలు చాలవు
యీగి ననుఁ గరుణించి యెపుడు నీవిచ్చేనంటేను
|
|
| చ. 2: |
నాపాపములే లెక్కించితినా నదులయిసుకలునుఁ జాలవు
యేపున నెంతైనాఁ గలదు అది యెన్నఁడు దీరును దేవా
చేపట్టి నీవు రక్షించిన యాజీవుల నెంచితివా తొల్లి
చూపట్టెడి యీయాకసంబు పై చుక్కలకంటే ఘనము
|
|
| చ. 3: |
మఱి నాసుద్దులు యెంచఁగ నెంచఁగ మంచముకిందే నూయి
గుఱి నీకథలివి వినఁబోతే నివే కొండలుఁ గోటానఁగోట్లు
నెఱవుగ శ్రీవేంకటేశ్వర నీకే నే శరణాగతి చొచ్చితిని
తఱి దరిచేర్పఁగఁ గూడువెట్టఁగా దైవము నీకే భారము
|
|
