ఈ పుట ఆమోదించబడ్డది
రేకు: 0249-05 సాళంగనాట సం: 03-282 శ్రీహరి పరివారము
పల్లవి:
నమో నమో దానవవినాశ చక్రమా
సమరవిజయమైన సర్వేశు చక్రమా
చ. 1:
అట్టే పదారుభుజాల నమరిన చక్రమా
పట్టినాయుధముల బలుచక్రమా
నెట్టన మూఁడుగన్నుల నిలిచిన చక్రమా
ఱట్టుగా మన్నించవే మెఱయుచు చక్రమా
చ. 2:
ఆరయ నారుగోణాల నమరిన చక్రమా
ధారలు వేయిటితోడి తగు చక్రమా
ఆరక మీఁదికి వెళ్లే అగ్నిశిఖల చక్రమా
గారవాన నీ దాసులఁ గావవే చక్రమా
చ. 3:
రవిచంద్రకోటితేజరాసియైన చక్రమా
దివిజసేవితమైన దివ్య చక్రమా
తవిలి శ్రీవేంకటేశు దక్షిణకర చక్రమా
యివల నీదాసులము యేలుకోవే చక్రమా
