ఈ పుట ఆమోదించబడ్డది
రేకు: 0249-04 మాళవి సం: 03-281 దశావతారములు
పల్లవి:
అందరికి సులభుఁడై అంతరాత్మ యున్నవాఁడు
యిందునే శేషగిరిని యిరవై విష్ణుఁడు
చ. 1:
యోగీశ్వరుల మతినుండేటి దేవుఁడు క్షీర-
సాగరశాయియైన సర్వేశుఁడు
భాగవతాధీనుఁడై న పరమపురుషుఁడు
ఆగమోక్తవిధులందు నలరిన నిత్యుఁడు
చ. 2:
వైకుంఠమందునున్న వనజనాభుఁడు పర-
మాకారమందునున్న ఆదిమూరితి
ఆకడ సూర్యకోట్లందునున్న పరంజ్యోతి
దాకొన బ్రహ్మాండాలు ధరించిన బ్రహ్మము
చ. 3:
నిండువిశ్వరూపమై నిలిచిన మాధవుఁడు
దండి వేదాంతములు వెదకే ధనము
పండిన కర్మఫలము పాలికివచ్చిన రాసి
అండనే శ్రీవేంకటేశుఁడైన లోకబంధుఁడు