ఈ పుట ఆమోదించబడ్డది
రేకు: 0241-04 ఆహిరినాట సం: 03-236 నృసింహ
పల్లవి:
అరుదరుదీగతి యహోబలేశ్వర
పొరిఁబొరి దాసులు పొగడుట యెట్టు
చ. 1:
యెదుటఁ జించితివి హిరణ్యకశిపుని
అదె ప్రహ్లాదుఁడు బంటగుటెట్లు
కదిసిన రుద్రుని గర్వ మడఁచితివి
గుదిగొని దివిజులు కొలుచుట యెట్టు
చ. 2:
ఘనసింహాకృతి గైకొనివుంటివి
యెనయఁగఁ గరిఁ గాచిన దెట్లు
పనివడి కంబము వగుల వెడలితివి
మనుజులు పూజించి మరుగుట యెట్లు
చ. 3:
సరవితో వీరరసమున మించితివి
అరయఁగ శృంగారివౌటెట్టు
సిరిపుర మెక్కెను శ్రీవేంకటాద్రిని
యిరవుగ నీ తొడ యెక్కుట యెట్టు
