ఈ పుట ఆమోదించబడ్డది
రేకు: 0225-01 రామక్రియ సం: 03-138 హనుమ
పల్లవి:
అన్నిటా నేరుపరి హనుమంతుఁడు
పిన్ననాఁడే రవినంటె పెద్ద హనుమంతుఁడు
చ. 1:
ముట్టిన ప్రతాపపు రాముని సేనలలోన
అట్టె బిరుదుబంటు శ్రీహనుమంతుఁడు
చుట్టి రానుండినయట్టి సుగ్రీవు ప్రధానులలో
గట్టియైన లావరి చొక్కపు హనుమంతుఁడు
చ. 2:
వదలక కూడినట్టి వనచర బలములో-
నదె యేకాంగవీరుఁడు హనుమంతుఁడు
చెదరక కుంభకర్ణు చేతి శూలమందరిలో
సదరాన విరిచె భీషణ హనుమంతుఁడు
చ. 3:
త్రిజగముల లోపల దేవతాసంఘములోన
అజుని పట్టాన నిల్చె హనుమంతుఁడు
విజయనగరాన శ్రీవేంకటేశు సేవకుఁడై
భుజబలుఁడై యున్నాఁ డిప్పుడు హనుమంతుఁడు