ఈ పుట అచ్చుదిద్దబడ్డది
రేకు: 0218-05 సాళంగం సం: 03-100 శరణాగతి
పల్లవి:
పలువిచారములేల పరమాత్మ నీవు నాకు
గలవు కలవు వున్నకడమ లేమిటికి
చ. 1:
నీ పాదముల చింత నిబిడమైతేఁ జాలు
యే పాతకములైన నేమి సేసును
యేపార నీ భక్తి ఇంత గలిగినఁ జాలు
పైపై సిరు లచ్చటఁ బాదుకొని నిలుచు
చ. 2:
సొరిది నీ శరణము చొచ్చితినంటేఁ జాలు
కరుణించి యప్పుడట్టే కాతువు నీవు
సరుస నీముద్రలు భుజములనుంటేఁ జాలు
అరుదుగాఁ జేతనుండు అఖిలలోకములు
చ. 3:
నేరక వేసినఁ జాలు నీ మీఁద నొకపువ్వు
కోరిన కోరికలెల్లఁ గొనసాగును
మేరతో శ్రీవేంకటేశ మిమ్ముఁ గొలిచితి నేను
యేరీతి నుండినఁ గాని యిన్నిటా ఘనుఁడను