ఈ పుట అచ్చుదిద్దబడ్డది
రేకు: 0391-03 సాళంగనాట సం: 04-528 హనుమ
పల్లవి:
పెరిగినాఁడు చూడరో పెద్ద హనుమంతుఁడు
పరగి నానా విద్యల బలవంతుఁడు
చ. 1:
రక్కసుల పాలికి రణరంగ శూరుఁడు
వెక్కసపు యేకాంగ వీరుఁడు
దిక్కులకు సంజీవి దెచ్చిన ధీరుఁడు
అక్కజమైనట్టి యాకారుఁడు
చ. 2:
లలి మీరిన యట్టి లావుల భీముఁడు
బలు కపికుల సార్వభౌముఁడు
నెలకొన్న లంకానిర్ధూమధాముఁడు
తలంపున రామునాత్మారాముఁడు
చ. 3:
దేవకార్యముల దిక్కు వరేణ్యుఁడు
భావింపఁగఁ దపః ఫల పుణ్యుఁడు
శ్రీ వేంకటేశ్వరు సేవాగ్రగణ్యుఁడు
సావధానుఁడు సర్వ శరణ్యుఁడు