ఈ పుట అచ్చుదిద్దబడ్డది
రేకు: 0387-05 నాట సం: 04-508 నృసింహ
పల్లవి:
ఇట్టి సుద్దులితనివి ఇదివో కొలువున్నాఁడు
నట్టనడుమ నీ సుగ్రీవ నారసింహుఁడు
చ. 1:
పగలూ రాతిరీఁ గాని పటు సంధ్యా కాలమందు
మొగిఁ బచ్చీ వెచ్చీగాని మొనగోళ్ళచే
గగనమూ నేలాఁ గాని గనమైన తొడమీఁద
నగుతా హిరణ్యుఁ గొట్టె నరసింహ దేవుఁడు
చ. 2:
వెలుపలా లోనాఁ గాని వెడఁగుగడపమీఁద
తలి తండ్రి గాని యట్టి తావునఁ బుట్టి
మొలచి చిగిరించని ముదురుఁగోరలతోడ
నలి హిరణ్యు జంకించె నరసింహ దేవుఁడు
చ. 3:
మానిసీ మెకమూఁగాని మంచి యాకారముతోడ
పూని యిల్లూఁ బందిలీఁ గాని గుహలో
ఆనుక హిరణ్యుని నడఁచీ శ్రీ వేంకటాద్రి
నానా దిక్కుల నేలిన నరసింహ దేవుఁడు