ఈ పుట అచ్చుదిద్దబడ్డది
రేకు: 0375-05 దేశి సం: 04-441 విష్ణు కీర్తనం
పల్లవి:
హరి నీవే సర్వాత్మకుఁడవు
యిరవగు భావన యియ్యఁగదే
చ. 1:
చూడక మానవు చూచేటి కన్నులు
యేడనేవైనా యితరములు
నీడల నింతా నీ రూపములని
యీడువడని తెలి వియ్యఁగదే
చ. 2:
పారక మానదు పాపపు మన సిది
యీరసములతో నెందైనా
నీరజాక్ష యిది నీమయమేయని
యీరీతుల తలఁ పియ్యఁ గదే
చ. 3:
కలుగక మానవు కాయపు సుఖములు
యిల లోపలఁ గల వెన్నైనా
అలరిన శ్రీ వేంకటాధిప నీకే
యిలనర్పితమను యహ మియ్యఁగదే
