ఈ పుట అచ్చుదిద్దబడ్డది
రేకు: 0369-05 గుండక్రియ సం: 04-408 అంత్యప్రాస
పల్లవి:
వెరగుతో మరచితే వెనక లేదు
కరి వరదుఁడే తక్క గతి యొండు లేఁడు
చ. 1:
ఆస విడిచినఁగాని యధిక సుఖము లేదు
యీసు విడిచినఁగాని యిహము లేదు
వాసి విడిచినఁ గాని వైపగు విరతి లేదు
వాసు దేవ భక్తిఁగాని వరముక్తి లేదు
చ. 2:
చలము మానినఁగాని సాత్వికగుణము లేదు
పలుశంక వోకకాని ఫలము లేదు
సిలుగింద్రియాల గెలిచినఁగాని త్రోవ లేదు
జలజాక్షుచింతఁగాని సమబుద్ధిలేదు
చ. 3:
దైవము కరుణనెకాని తగువిజ్ఞానము లేదు
భావించి చూచినఁగాని బలిమి లేదు
యీవల శ్రీ వేంకటేశుఁ డితడె దైవ మితని
సేవించినంతఁగాని సిద్ధి మరి లేదు