ఈ పుట అచ్చుదిద్దబడ్డది
రేకు: 0361-02 లలిత సం: 04-358 వేంకటేశ్వరౌషధము
పల్లవి:
అన్నిటికి నిది పరమౌషధము
వెన్నుని నామమే విమలౌషధము
చ. 1:
చిత్తశాంతికిని శ్రీ పతి నామమె
హత్తిననిజ దివ్యౌషధము
మొత్తపు బంధవిమోచనంబునకు
చిత్తజ గురుఁడే సిద్దౌషధము
చ. 2:
పరిపరి విధముల భవ రోగములకు
హరిపాద జలమె యౌషధము
దురితకర్మములఁ దొలఁగించుటకును
మురహర పూజే ముఖ్యౌషధము
చ. 3:
యిల నిహపరముల నిందిరావిభుని -
నలరి భజింపుటె యౌషధము
కలిగిన శ్రీ వేంకటపతి శరణమే
నిలిచిన మాకిది నిత్యౌషధము
