పుట:తాళ్ళపాక పదసాహిత్యం - నాలుగవ భాగం.pdf/298

రేకు: 0351-01 శ్రీరాగం సం: 04-297 వేంకటగానం

పల్లవి :⁠

చేరి కొల్వరో యాతఁడు శ్రీదేవుఁడు యీరీతి శ్రీవేంకటాద్రి నిరవైన దేవుఁడు

⁠

చ. 1:⁠

అలమేలుమంగ నురమందిడుకొన్నదేవుఁడు చెలఁగి శంఖచక్రాలచేతి దేవుఁడు కలవరదహస్తముఁ గటిహస్తపు దేవుఁడు మలసీ శ్రీవత్సవనమాలికల దేవుఁడు

⁠

చ. 2:⁠

ఘనమకరకుండలకర్ణముల దేవుఁడు కనకపీతాంబర శృంగార దేవుఁడు ననిచి బ్రహ్మాదుల నాభిఁగన్నదేవుఁడు జనించెఁ బాదాల గంగ సంగతైన దేవుఁడు

⁠

చ. 3:⁠

కోటిమన్మథాకార సంకులమైన దేవుఁడు జూటపుఁగిరీటపు మించుల దేవుఁడు వాటపుసొమ్ములతోడి వసుధాపతిదేవుఁడు యీటులేని శ్రీవేంకటేశుఁడైన దేవుఁడు

⁠