పుట:తాళ్ళపాక పదసాహిత్యం - నాలుగవ భాగం.pdf/251

రేకు: 0343-01 మలహరి సం: 04-250 భక్తి

పల్లవి :⁠

మానరో వో లోకులాల మాకు మీకు నేమి దోడు నాఁటికిఁక మీకు నవ్వుఁబాటు నేము

⁠

చ. 1:⁠

యిరవై నానోటికి యెన్నెన్ని చదివిన హరియనేయంతరుచి అందు లేదు గరిమ నెన్నిరూపులు కన్నుల నేఁ జూచినాను పురుషోత్తముఁ జూచినపూర్తి యందు లేదు

⁠

చ. 2:⁠

యెచ్చోట నుండినాను యిందిరేశుమందిరము చొచ్చి యుండేసుఖ మంత చొప్పడ దందు కచ్చుపెట్టి వీనులకుఁ గతలెన్ని విన్నాను అచ్చుతుకీర్తన వినేయందు సరి రాదు

⁠

చ. 3:⁠

కైపుగాఁగ కన్నవారికాళ్ళకు మొక్కినాను శ్రీపతికిమొక్కినంత సెలవు గాదు యేపున శ్రీవేంకటేశు విటులఁ బూజించినట్టు మాపుదాఁకా నితరుల మనసురాదు

⁠