పుట:తాళ్ళపాక పదసాహిత్యం - నాలుగవ భాగం.pdf/182

రేకు: 0331-04 కౌశి సం: 04-181 వేంకటగానం

పల్లవి :⁠

కొండంతపొడవుతోడ కోనేటిరాయఁడు వీఁడె నిండుకొని రథమెక్కి నిలుచున్నవాఁడు

⁠

చ. 1:⁠

పాతాళవాసులైన బలురక్కసుల మీఁద యేతులఁ బరపెఁ దేరు యిదె దేవుఁడు ఆతల జలధిచొచ్చినట్టి దానవులమీఁద ఘాతతోడఁ దోలె నదె కడు రభసమున

⁠

చ. 2:⁠

ఆకాశము దూరినట్టి యదటు దైత్యులమీఁద దాకతో నడపించెఁ బంతాన దేవుఁడు దీకొని యష్టదిక్కులఁ దిరిగి యసురలపై భీకరముగా మోగించె బిరుదులు మెరసి

⁠

చ. 3:⁠

ధరమీఁదఁ గలిగిన దనుజకోట్ల నెల్ల సొరిది శ్రీవేంకటేశుఁడు పారఁదోలెను గరిమ నలమేల్మంగ నురమునఁ బెట్టుకొని తిరముకొలిపెఁ దేరు దిక్కులెల్ల గెలిచి

⁠