ఈ పుట అచ్చుదిద్దబడ్డది
రేకు: 0298-1 శ్రీరాగం సం: 09-283
పల్లవి:
నీ కేమిటఁగడమ నీచేతిలో వాఁడతఁడు
మైకొని నీయడఁ జేసే మన్నన యెరఁగవా
చ. 1:
ఆరీతి మాటాడఁగా నిన్నౌఁ గాదనరాదు గాక
కూరిమి నీపతి యిచ్చకుఁడెకాఁడా
మేరలు మీరినచోట మెప్పించరాదుగాక
యీరాని చనవు లాతఁ డిచ్చుట యెరఁగవా
చ. 2:
కాఁతాళించివున్నవేళ కై కొలుపరాదుగాక
చేఁతల నీచెప్పినట్టు సేయఁడా తొల్లి
మోఁతతోఁ దలవంచఁగా మొగి నవ్వరాదుగాక
బాఁతిపడి యతఁడు చేపట్టుట యెరఁగవా
చ. 3:
తప్పకచూడఁగా నిన్ను తలపించరాదుగాక
యెప్పుడూ శ్రీవెంకటేశుఁ డిరవెకాఁడా
నెప్పునఁ దలవంచఁగా నేర మెంచరాదుగాక
కుప్పలుఁ దెప్పలుగాఁగ కూడుట యెరఁగవా