ఈ పుట అచ్చుదిద్దబడ్డది
రేకు: 0251-1 దేసాక్షి సం: 09-001
పల్లవి:
దగ్గరితె మొగచాటు దువ్వులు నుంటేఁ జవి
నిగ్గుల యీరెండూను నీవొళ్లనే కంటినే
చ. 1:
చెలియ పతిఁ గానక చింతతో నుండి ఆతఁడే
పిలువఁగా యిప్పుడైతే బిగిసేవే
కలయ నంటా దూరి గక్కనఁ జెయి వట్టితే
మొలకనవ్వులతోడ ములిగేవే
చ. 2:
అప్పుడైతే యెడమాట లాడించి నాయకుఁడు
తప్పక చూచితే నిట్టె తల వంచేవే
వుప్పతించి దూరఁగగానె వొద్దఁ గూచుండి నాతఁడు
పిప్పిగట్టే సిగ్గులతోఁ బెనఁగేవే
చ. 3:
చిత్తములోఁ గోరినట్టి శ్రీవెంకటేశ్వరుఁడు
అత్తి నిన్నుఁ గూడితేనె అలసేవే
పొత్తుల మోవితేనెతీపుల సోకించె నితఁడు
బత్తి సేయఁగా నీవు భ్రమసేవే
