ఈ పుట అచ్చుదిద్దబడ్డది
రేకు: 0090-6 శ్రీరాగం సం: 05-355
పల్లవి:
ఎట్టు ధరియించెనో యీ యింతి హృదయంబు
పట్టనెట్లోపునో ప్రాణవాయువులు
చ. 1:
వడియుఁ జెమటలనుఁ దుడువఁ గరాని పన్నీట
తడియుఁ బయ్యదయుఁ దత్తరమందు మనసు
సుడియుఁ దమకములచే సొలయు నలపుల మేన
విడియుఁ బులకలు చూడ వెరగైన మోము
చ. 2:
మురియుఁదలఁపులును జలమునఁబొదలు మదనాగ్నిఁ
నురియుదేహంబు గడు నుదుటుఁగోరికలు
విరియు మానంబు నరవిరి సొలపుమాఁటలునుఁ
గురియు మోహజలంబు కొదలుఁజూపులును
చ. 3:
వెదచల్లునూర్పులును వెలితైన నవ్వులును
సదమదంబైన పలుచనిమేనిపూఁత
అదన శ్రీ తిరువేంకటాద్రీశు కౌఁగిటను
గదిసి యింపులఁ బొదలఁ గలిగె నీ చెలికి
