ఈ పుట అచ్చుదిద్దబడ్డది
రేకు: 0070-5 సామంతం సం: 05-233
పల్లవి:
రెప్పవేసి లోకమెల్ల రేయుఁ బగలుఁ జేయనేర్చుఁ
చెప్పరాని చేఁతలెల్ల చెప్పిచూపనేర్చునే
చ. 1:
పాలలోను దచ్చి వెన్న పలుదెరఁగులఁ దివియనేర్చు
రాలువేసి నీరుమీఁదఁ దేలఁజేయు నేర్చును
గాలిపుంటి సంటి లోనఁ గాఁపురంబు సేయనేర్చు
అలికట్టుఁ జీరలోన నాలిఁబడయనేర్చును
చ. 2:
ముద్దులాఁడికొడుకుచేత ముజ్జగములు దిప్పనేర్చును
చద్దికంట వేఁడికంటఁ జక్కఁజూడ నేర్చును
గద్దెరాతి కొండవింట గసికయై చెలఁగనేర్చు
సుద్దులెల్ల మందులనఁగ సొంపుమిగులనేర్చును
చ. 3:
పాఁపరేని కొండమీఁదఁ బందివేఁటలాడ నేర్చు
గోపసతుల మానమెల్ల కొల్లలాడనేర్చును
యేపు మీరినట్టి వేంకటేశుఁడనెడివాఁడు పిన్న-
పాఁపడై యశోదయెదుట పరువులిడఁగ నేర్చును