ఈ పుట అచ్చుదిద్దబడ్డది
రేకు: 0213-2 మలహరి సంపుటం: 08-074
పల్లవి:
ఏలనన్నుఁబాసితివి యిందాఁకానేడపరాకు
తాలిమిగలదాననా తలఁచి నీయడకు
చ. 1:
మొక్కితిఁగా అల్లనాఁడె మొరఁగులు మానుమని
తక్కులేక వలచినదాన నేనని
నిక్కపుటాసలు నాలో నిండియుండవివియని
మక్కువనాతోఁగూడి మన్నించుమని
చ. 2:
సేవలెల్లాఁ జేసితిగా సిగ్గులు వడకుమని
వేవేలు నావిన్నపాలు వినుమని
భావించునావల్ల నీకు పంతమెల్లాఁజేరెనని
నీవల్లఁ దప్పులేకుండా నెరవేరించుమని
చ. 3:
కప్పితిఁగాపయ్యద యీకపటము వాసెనని
చిప్పిలె నాచిత్తము నీచేఁతలనని
యిప్పుడె శ్రీవేంకటేశ యేలితివి నన్నునిట్టె
దప్పిదేరె మోవితేనెఁదనిసితినని