ఈ పుట అచ్చుదిద్దబడ్డది
రేకు: 0210-6 దేవగాంధారి సంపుటం: 08-060
పల్లవి:
ఇంకేల మొరఁగేవే యింతి మాతో నేఁడు
లంకెసింగారముల లలి మీరుఁ గాక
చ. 1:
చిగురుఁ గెమ్మోవిపై చిలుక వోట్లమరునా
మిగులఁగ కోవిలల మేఁత గాక
జిగిఁ జెక్కుటద్దముల చెమటచిత్తడేలే
పొగరుమెఱుఁగుల కళల పొడి రాలుఁగాక
చ. 2:
జక్కవకుచంబులకు చంద్రోదయములేలే
నిక్కి రత్నపుటెండ నిగుడుఁ గాక
పక్కన నడుమును బయలువాఁకనేలే ఆరు
అక్కడ నిట్టూర్పుగాలి అలరుఁ గాక
చ. 3:
పొంచి తనువల్లిపై పులకమొలకలు (ల?) దేలె
పంచాస్త్రువిదులందు పరుగుఁ గాక
యెంచగల శ్రీవేంకటేశుఁడిదివో కూడె
ముంచుకొని తలఁబాలు మురుకొనుఁ గాక