ఈ పుట అచ్చుదిద్దబడ్డది
రేకు: 0244-2 సాళంగనాట సంపుటం: 08-260
పల్లవి:
పొద్దువోని వానికిట్టె బుద్ది చెప్పవే
వుద్దండాలు చూప మోవి వూరడించేనే
చ. 1:
చదురులాడి యాతఁడు సారెకు నేరుతునంటా
వదరుఁదనములనె వాదించెనే
పరది యందుకు నేను పైకొని కొంగుపట్టితే
సదరము సేసుకొని సాదించెనే
చ. 2:
చలివాపి యింతలోనె సంగడి నిలువఁబెట్టి
పొలతులఁ దెచ్చి నాతోఁ బోలించీనే
తెలిసి అప్పటి నేను దీకొని నిలిచితేను
సొలపుల సొక్కించి సోలించీనే
చ. 3:
ఆరయ శ్రీ వెంకటేశుఁ డాయములంటి నన్ను
కోరి తన కాఁగిటిలోఁ గూడించీనే
తేరిచూచి యీవేళ తేనెమోవి యానితేను
ఆరితేరి మారుమాట లాడించీనే
