ఈ పుట అచ్చుదిద్దబడ్డది
రేకు: 0229-1 దేవగాంధారి సంపుటం: 08-169
పల్లవి:
ఆయమంటి మోవితీపులానఁగ రాదా
వోయమ్మ వద్దనున్నాఁడు వూరకుండ నేఁటికే
చ. 1:
చెక్కు నొక్కఁ బొద్దులేదో సేదదేరఁ బొద్దులేదొ
గుక్కక పతిఁ గాఁగిటఁ గూడఁగ రాదా
వెక్కసపు విరహాన విసిగితివిందాఁక
యిక్కడికే పతి వచ్చె నిఁకనేలే కొసరు
చ. 2:
నవ్వు నవ్వ వేళలేదొ నమ్మికకు వేళలేదో
పువ్వువలెఁ గాఁగిటను పొదుగరాదా
దవ్వుల నున్నాఁడంటా తమకించితివిందాఁక
యివ్వల నీ గుబ్బలంటె నిఁక జాగువలెనా
చ. 3:
మాటాడఁ దతిలేదొ మనసియ్యఁ దతిలేదొ
గాఁటముగ దెరవేసి కలయరాదా
యేఁట వెట్టి శ్రీ వెంకటేశుఁడిదె నిన్నుఁగూడె
యీటుగానే మన్నించె నిఁక నెదురేదే