ఈ పుట అచ్చుదిద్దబడ్డది
రేకు: 0225-4 బౌళిరామక్రియ సంపుటం: 08-148
పల్లవి:
నేరుపరులకునెల్లా నీవు సేసినదే పాడి
అరయఁ గడపరాయ అంతవాఁడవౌదువు
చ. 1:
కందువమాటలనే కంకణాలు గట్టికట్టి
సందడిఁ బెండ్లాడేవు చతురుఁడవు
చందమామగుటుకల సారెనవ్వి వావులెల్లా
అందలానఁ బెట్టుకొంటి వంతవాఁడవౌదువు
చ. 2:
పోరచి మోవితేనెలు పొదిగి తోడంటువెట్టి
సారెకు విందవెట్టేవు చతురుఁడవు
కోరి నిన్నుఁ జూచితే నాకొనచూపుల ముత్యాల
హారాలుగా వేసుకొనే వంతవాఁడవౌదువు
చ. 3:
వొల్లనే చేతులు చాఁచి వుడివోని వలపులు
చల్లి వుంకువలిచ్చేవు చతురుఁడవు
యెల్లగా శ్రీవెంకటాద్రినెనసి నావిన్నపాలు
అల్లంతనే వింటివంతవాఁడవౌదువు
