ఈ పుట ఆమోదించబడ్డది
రేకు: 0064-02 శ్రీరాగం సం: 01-329 అధ్యాత్మ
పల్లవి:
కొంచెమును ఘనముఁ గనుఁగొననేల హరిఁదలఁచు
పంచమహపాతకుఁడే బ్రహ్మణోత్తముఁడు
చ.1:
వేదములుచదివియును విముఖుఁడై హరికథల
నాదరించనిసోమయాజికంటె
యేదియునులేనికులహీనుఁడైనను విష్ణు
పాదసేవకుఁడువో బ్రహ్మణోత్తముఁడు
చ.2:
పరమమగువేదాంతపఠన దొరకియు సదా
హరిఁదలఁచలేని సన్న్యాసికంటె
మరిగి పసురముఁదినెడిమాలయైనను వాఁడె
పరమాత్ముఁ గొలిచినను బ్రహ్మణోత్తముఁడు
చ.3:
వినియుఁ జదివియు రమావిభునిఁ దలఁపక వృథా
తనువు వేఁపుచుఁ దిరుగతపసికంటె
చనవుగల వేంకటేశ్వరుదాసులకు వెంటఁ
బనిదిరుగునధముఁడే బ్రహ్మణోత్తముఁడు