రేకు: 0029-04 సామంతం సం: 01-179 వైరాగ్య చింత
| పల్లవి: |
అయ్యోపోయఁ బ్రాయముఁ గాలము
ముయ్యంచు మనసున నే మోహమతినైతి
|
|
| చ. 1: |
చుట్టంబులా తనకు సుతులుఁ గాంతలుఁ జెలులు
వట్టి యాసలఁ బెట్టువారే కాక
నెట్టుకొని వీరు గడు నిజమనుచు హరి నాత్మఁ
బెట్టనేరక వృధా పిరివీకులైతి
|
|
| చ. 2: |
తగుబంధులా తనకుఁ దల్లులునుఁ దండ్రులును
వగలఁ బెట్టుచుఁ దిరుగువారే కాక
మిగుల వీరలపొందు మేలనుచు హరినాత్మఁ
దగిలించ లేక చింతాపరుఁడనైతి
|
|
| చ. 3: |
అంత హితులా తనకు నన్నలునుఁ దమ్ములును
వంతువాసికిఁ బెసఁగువారే కాక
అంతరాత్ముఁడు శ్రీవేంకటాద్రీశుఁ గొలువ కిటు
సంత కూటముల యలజడికి లోనైతి
|
|
