పుట:తరికొండ నృసింహశతకము (తరికొండ వేంగమాంబ).pdf/25

చ.⁠

పరశువు చేతఁబూని, నరపాలవరేణ్యుల మస్తకంబులన్ ఇరువదియొక్క మాఱు సురలెల్ల నుతింపఁగఁ ద్రుంచి, రక్తమం దరయఁగఁ దల్లిదండ్రులకుఁ దర్పణ మొప్పఁగఁ జేసినాఁడవౌ! గుఱుతుగ మేరుధీర! తరిగొండ నృసింహ! దయాపయోనిధీ!

⁠ 12

భావం:

దయాసముద్రుడవయిన తరిగొండ లక్ష్మీనృసింహదేవా! నీవు గండ్రగొడ్డలిని చేతబూని నిరంకుశులయిన రాజన్యుల శిరస్సులను దేవతలు నుతిస్తూవుండగా ఇరువదియొక్క పర్యాయాలు ఛేదించి, వారల రక్తంతో తల్లిదండ్రులకు తర్పణాలు విడిచిన సాహసివి! అలాంటి అద్వితీయపితృభక్తిపరాయణుడవూ, మేరునగధీరుడవూ అయిన పరశురామావతారా! నీకు నమస్కారం!