పుట:తరికొండ నృసింహశతకము (తరికొండ వేంగమాంబ).pdf/19

ఉ.⁠

అచ్చపు భక్తితోడ దనుజాంతక! నే నిటు సర్వకాలమున్ హెచ్చుగ మీ పదాబ్జముల నింపుగ నమ్మినదాన, మాధవా! మచ్చికతోడ నన్నెపుడు మన్ననసేయు మహానుభావ! యే కుచ్చిత ముంచఁబోకు! తరిగొండ నృసింహ! దయాపయోనిధీ!

⁠ 6

భావం:

దయాసముద్రుడవయి తరిగొండలో ఆవిర్భవించియున్న శ్రీలక్ష్మీనృసింహదేవా! రాక్షసాంతకుడవైన మాధవా! ఎంతో కాలంగా నేను అచ్చమైన భక్తిభావంతో మీ పాదపద్మాలనే పరిపూర్ణంగా నమ్ముకొని యున్నాను. కావున, ప్రేమతో నన్ను ఆదరింపుమా! మరో విధంగా భావించి నన్ను విడనాడవలదు మహానుభావా!