పుట:ఆంధ్రకామందకము (జక్కరాజు వేంకటకవి).pdf/47

క.⁠

చుట్టలయెడఁ బగతులయెడ గట్టిగఁ బ్రియ మాడవలయుఁ గడుఁ బ్రియములఁ గ న్పట్టినదొర కేకలఁ దగి నట్టి నెమలిలీల నేరి కాప్తుఁడు గాఁడే.

⁠ 52

క.⁠

కేకుల కేకలు కోకిల కాకలి రాచిలుక కులుకు కలికి పలుకులున్ జేకుఱఁ జేయవు ముద మీ లోకమునకు సుజనుపల్కులుం బలె నెపుడున్.

⁠ 53

క.⁠

దయ విశ్వాసము మర్యా దయు సుగుణాసక్తిఁ గలిగి ధన మీయఁదగున్ నయగతి ధర్మముకొఱకై ప్రియభాషల నమృతరసము పెరుగుచు నుండున్.

⁠ 54

గీ.⁠

ప్రజఁ దను నుతింప నధికసంపదల మించి పలుకుఁ దేనియ వెల్వారఁ జిలుకుచుండ్రు చెలఁగి సత్కార మెవ్వరు చేయుచుండ్రు వారె నరులై చరించు దేవతలు భువిని.

⁠ 55

క.⁠

పావనుఁడై యాస్తికుఁడై దేవతలం గొలువవలయ దేవతలబలెన్ భూవిభుఁడు గురులఁ గొలువం గావలెఁ దనవలెనె మిత్రుఁ గనుగొనవలయున్.

⁠ 56

క.⁠

సురలను సత్కర్మముచే గురులను మ్రొక్కుటలచేతఁ గువలయపతి స త్పురుషుల సుచరిత్రముచేఁ బరితుష్టులఁ జేయఁదగు శుభం బొదవుటకై.

⁠ 57