శ్రీ
అనుభవసారము
శ్రీగురులింగజంగమవిశిష్ట[1]విభేదసదన్వయంబులన్ శ్రీగురులింగజంగమముఁ జెప్పఁ ద్రిమూర్తి [2]నిరూఢమై చనున్ శ్రీగురులింగజంగమవిశేషము లేకముగాఁ దలంచి యా శ్రీగురులింగజంగమవశీ[3]కృత మౌమదిఁ గొల్చి సమ్మతిన్.
పరమపరుం బరమేశ్వరుఁ బరమానందస్వభావు భక్తి నుతింతున్ గురులింగము హరలింగముఁ జరలింగము శాంత్యతీతు శంభున్ శరణున్.
భవనాశుఁ బాపనాశను వివిధేంద్రియవిషయనాశు వినుతింతు సదా శివు శివదేవు శివాత్మకుఁ బ్రవిమలవిజ్ఞాను భర్గు భక్తనిధానున్.
పశుపాశవినిర్ముక్తునిఁ బశుపాశపతిన్ భజింతుఁ బశుపాశవిసృ ష్టశరీరు విముక్తి[4]ప్రద కుశలున్ విశ్వేశు విమలు గురు హరు శరణున్.