తాళ్ళపాక పదసాహిత్యం/రెండవ సంపుటం/రేకు 186
రేకు: 0186-01 దేవగాంధారి. సం: 02-432 భగవద్గీత కీర్తనలు
పల్లవి:
అణురేణు పరిపూర్ణమైన రూపము
అణిమాది సిరి యంజనాద్రిమీఁది రూపము
చ. 1:
వేదాంతవేత్తలెల్లా వెదకేటి రూపము
ఆదినంత్యములేని యారూపము
పాదుగ యోగీంద్రులు భావించు రూపము
యీదెస నిదివో కోనేటిదరి రూపము
చ. 2:
పాలజలనిధిలోనఁ బవళించే రూపము
కాలపు సూర్యచంద్రాగ్నిగల రూపము
మేలిమి వైకుంఠాన మెరసిన రూపము
కీలైనదిదే శేషగిరిమీఁది రూపము
చ. 3:
ముంచిన బ్రహ్మాదులకు మూలమైన రూపము
కొంచని మఱ్ఱాకుమీఁది కొన రూపము
మంచి పరబ్రహ్మమై మమ్మునేలిన రూపము
యెంచఁగ శ్రీవేంకటాద్రినిదే రూపము
రేకు: 0186-02 గుండక్రియ సం: 02-433 శరణాగతి
పల్లవి:
నేనేమిఁ జేయఁగలేను నీవు పరిపూర్ణుఁడవు
హీనుఁడ నే నధికుఁడ విన్నిటా నీవు
చ. 1:
దండము వెట్టుట నాది తప్పు లోఁగొనుట నీది
నిండి నీవెప్పుడు దయానిధివి గాన
అండఁ బేరుకొంట నాది అందుకు నూఁకొంట నీది
దండియైన దేవదేవో త్తముఁడవు గాన
చ. 2:
శరణు చొచ్చుట నాది సరుగఁ గాచుట నీది
పరమ పురుష శ్రీపతివి నీవు
విరులు చల్లుట నాది వేవేలిచ్చుట నీది
పొరి నీవు భక్తసులభుఁడ వటుగాన
చ. 3:
దాసుఁడననుట నాది తప్పక యేలుట నీది
ఆసదీర్చే వరదుఁడ వటుగాన
నీసేవ యొక్కటి నాది నిచ్చలుఁ గైకొంట నీది
యీసులేని శ్రీవేంకటేశుఁడవు గాన
రేకు: 0186-03 బౌళి సం: 02-434 శరణాగతి
పల్లవి:
ఎట్టైనాఁగావకపోదు యే నెంత సేసినాను
యిట్టే నీకు శరణంటి నిదియే తెరఁగు
చ. 1:
చేకొని నే మొక్కఁగాను చేతులు గోయఁగరాదు
ఆకడఁ దప్పుకుఁ దగినాజ్ఞ మానరాదు
కైకొని యపరాధాలే కావించితి నెన్నైనా
యీకడ నీశరణంటి నిఁకనో తెరఁగు
చ. 2:
చిక్కి దైన్యపడఁగాను చెలఁగి ఖండించరాదు
చక్కఁగా నాద్రోహాలు సైరించరాదు
అక్కడఁ జూచిన శరణాగతబిరుదు నీకు
యిక్కడ నీశరణంటి నిఁకనో తెరఁగు
చ. 3:
సేవసేయుచుండఁగాను జీతము మానుపరాదు
యీవిధి నాన దోసితే నిందుకోరాదు
దేవుఁడ నిన్నుఁ గొలిచి తెగి కర్మా లుడిగితి
యీవల శ్రీవేంకటేశ ఇఁకనో తెరఁగు
రేకు: 0186-04 గుండక్రియ సం: 02-435 అధ్యాత్మ
పల్లవి:
ధరలో "నెద్భావం తద్భవ'"తనెఁ గాన
హరిమయమే జగమంతాను
చ. 1:
మహి నెదిటివారందు మలినము దలఁచిన
తహతహ మనసే తా మలినము
వహి నెదిటందు భావనము భావించిన
బహువిధములఁ దానూ భావనమే
చ. 2:
యెక్కువ నెదిటిపాపా లెంచి నిందించేటి-
నిక్కపునాలుక తానే నిందితము
వొక్కటై యెదిటిపుణ్యా లుగ్గడించి ఘనమంటే
దక్కిన పుణ్యపు జహ్వ తానూ ఘనమే
చ. 3:
సారె శ్రీవేంకటపతి సగుణము దలఁచిన
సారపు జీవుఁడు దాను సగుణమే
నేరుపుల నాతని నిర్గుణము దలఁచిన
తారతమ్యములులేని తానూ నిర్గుణమే
రేకు: 0186-05 భూపాళం సం: 02-436
పల్లవి:
ఎందాఁక నిద్ర నీకిదె తెల్లవారెఁ గదె
యిందిరారమణ నీవిటు మేలుకొనవే
చ. 1:
కమలనాభుఁడ నీకు గంగాదినదులెల్ల-
నమర మొకమజ్జనం బాయితము సేసె
తమితోడఁ గనకాద్రి తానే సింహాసనము
విమలమై యొప్పె నదే విచ్చేయవే
చ. 2:
హరి నీకు నజుఁడు పంచాంగంబు వినిపించ
నిరతమగు వాకిటను నిలిచినాఁడు
సురలు నీయవసరము చూచుకొని కొలువునకు
సరవి నాయిత్తపడి సందడించేరు
చ. 3:
కామధేనువు వచ్చె కనుఁగొనుటకై నీకు
శ్రీమహాదేవి నీచేలాగు కదివో
యీమహిమ శ్రీవేంకటేశ నీకే చెల్లె
కామించి యన్నియునుఁ గైకొంటివిపుడు
రేకు: 0186-06 సాళంగనాట సం: 02-437
పల్లవి:
రామా రామభద్ర రవివంశరాఘవ
యేమి యరుదిది నీకింతటివానికిని
చ. 1:
నాఁడు రావణు తలలు నఱకిన లావరివి
నేఁడు నాపాపములు ఖండించరాదా
వాఁడిప్రతాపముతోఁడ వారిధిగట్టిన నాటి-
వాఁడవిట్టె నామనోవార్థిఁ గట్టరాదా
చ. 2:
తనిసి కుంభకర్ణాది దైత్యుల గెలిచితివి
కినిసి నాయింద్రియాల గెలువరాదా
యెనసి హరుని విల్లు యెక్కుపెట్టి వంచితివి
ఘనము నాదుర్గుణము కడు వంచరాదా
చ. 3:
సరుస విభీషణుఁడు శరణంటేఁ గాచితివి
గరిమ నే శరణంటిఁ గావరాదా
తొరలి శ్రీవేంకటేశ దొడ్డుగొంచ మెంచనేల
యిరవై లోకహితానకేదైనా నేమీ