తాళ్ళపాక పదసాహిత్యం/రెండవ సంపుటం/రేకు 183
రేకు: 0183-01 లలిత సం: 02-415 అద్వైతము
పల్లవి:
దోమటి నింతెరఁగరా తొల్లిటివారు
వామదేవవసిష్ఠవ్యాసాదులు
చ. 1:
తానే దైవమైతే తపమేల జపమేల
పూని సారెఁ బూజించే పూజలేల
కూను వంగి యింటింటఁ గోరనేల వేఁడనేల
యీనెపాన లోకమెల్లా నేలరాదా తాను
చ. 2:
తగఁ దా స్వతంత్రుఁడై తే దరిద్రదుఃఖములేల
నొగిలి వ్యాధులచేత నొవ్వనేల
నగుఁబాటులైన జననమరణములేల
ముగురువేల్పులదండ మొనచూపరాదా
చ. 3:
శ్రీవేంకటేశుఁడే శేఖరపు దైవమని
సావధానుఁ డితనికి శరణుచొచ్చి
భావములోపలఁ దనపాపబంధములఁ బాసి
తావుల నాతనికృప దండ చేరరాదా
రేకు: 0183-02 గుండక్రియ సం: 02-416 శరణాగతి
పల్లవి:
అవియు నాకుఁ బ్రథమాచార్యులు
తవిలి యీనెపము మిముఁ దలఁపించుఁగాన
చ. 1:
ధనవాంఛ మతిలోనఁ దగిలినప్పటివేళ
దనుజారి మీమీఁద దలఁపు గలుగు
పొనిగి భయదుఃఖములఁ బొరలినప్పటివేళ
పనివూని మీమీఁది భక్తి గలుగు
చ. 2:
చెలఁగి పాపములు మించినవేళ హరి మీ-
నలువు నామోచ్చారణంబు గలుగు
బలిమి భవరోగముల బడలినప్పటివేళ
వలుమారు మీసంప్రార్థనలు గలుగు
చ. 3:
ఇన్నిటాఁ దొలఁగి మిము నెరిఁగి కొలిచినవేళ
మన్ననల పరిణామంబు గలుగు
వున్నతపు శ్రీవేంకటోత్తముఁడ మిము నెదుటఁ
గన్న యీవేళ సౌఖ్యంబులే కలుగు
రేకు: 0183-03 లలిత సం: 02-417 వైష్టవ భక్తి
పల్లవి:
ఈతని మరచివుంటి మిన్నాళ్లును
యీతల నేఁడెచ్చరించె నీతఁడే పో విష్ణుఁడు
చ. 1:
తల్లియై పోషించు తండ్రియైరక్షించు
వుల్లపు బంధువుఁడై వొడ లరయు
మెల్లనె దాతై ఇచ్చు మెలుఁతయై యాదరించు
యెల్లవిధబంధువుఁడు యీతఁడే పో విష్ణుఁడు
చ. 2:
యేలికయై మన్నించు నిష్టుఁడై బుద్ధి చెప్పు
చాలుమానిసియై యంచలఁ దిరుగు
బాలుఁడై ముద్దుచూపు ప్రాణమై లోన నుండు
యీలాగుల బంధుఁ డీతఁడే పో విష్ణుఁడు
చ. 3:
దేవుఁడై పూజగొను ద్రిష్టిగోచరమై
శ్రీవేంకటాద్రిమీఁద సిరు లొసగు
తావై యెడమిచ్చు తలఁపై ఫలమిచ్చు
యీవల నావల బంధుఁడీతఁడేపో విష్ణుఁడు
రేకు: 0183-04 లలిత సం: 02-418 అధ్యాత్మ
పల్లవి:
వీదిలోన నదేకదే విష్ణుపదము
ఆదెసనే పాయకుండు నాధిమూలము
చ. 1:
చూచేటి చూపులకును సూటియైన మొదలేదో
యేచి వినుకలిమర్మ మెందు దాఁకీనో
వాచవిచవులు చూచే వంటశాల చోటేదో
ఆచాయనే వుండు నాదిమూలము
చ. 2:
పూఁప తలపోఁతలకు పుట్టినయి ల్లది యేదో
పైపై నూర్పులు నిలువఁగఁ జోటేదో
మాపులు నిద్రించువేళ మరచేటి చోటేదో
ఆపొరుగుననే వుండు నాదిమూలము
చ. 3:
నేరిచిన విద్యలెల్లా నించి దాఁచేచోటేదో
కోరని యానందముకొన యేదో
ఆరయ శ్రీవేంకటేశుఁ డాడనే పాయక వుండు
ఆరితేరి నాతఁడీతఁ డాదిమూలము
రేకు: 0183-05 బౌళి సం: 02-419 భగవద్గీత కీర్తనలు
పల్లవి:
దేహి నిత్యుఁడు దేహము లనిత్యాలు
యీహల నా మనసా యిది మరవకుమీ
చ. 1:
గుదిఁ బాతచీర మాని కొత్తచీర గట్టినట్టు
ముదిమేను మాని దేహి మొగిఁ గొత్తమేను మోచు
అదనఁ జంపఁగ లేవు ఆయుధము లీతనిఁ
గదిసి యగ్నియు నీరు గాలియుఁ జంపఁగలేవు
చ. 2:
యీతఁడు నరకువడఁ డీతఁ డగ్నిఁ గాలఁడు
యీతఁడు నీట మునుఁగఁ డీఁతఁడు గాలిఁబోఁడు
చేతనుఁడై సర్వగతుండౌ చెలియించఁ డేమిటను
యీతల ననాది యీతఁ డిరవు గదలఁడు
చ. 3:
చేరి కానరానివాఁడు చింతించరానివాఁడు
భారపు వికారాలఁ బాసినవాఁడీ యాత్మ
ఆరయ శ్రీవేంకటేశు నాధీన మీతఁడని
సారము దెలియుటే సత్యం జ్ఞానము
రేకు: 0183-06 బౌళి సం: 02-420 గురు వందన, శరణాగతి
పల్లవి:
హరి సేవొకటే యనంతము
గురుబోధలకును కొలఁదే లేదు
చ. 1:
తలఁచిన కొలఁదే తనలో భావము
నిలిపిన కొలఁదే నేమము
పలికిన కొలఁదే పరమగు సత్యము
యిల నెవ్వరికిని యెక్కుడు లేదు
చ. 2:
జరిపిన కొలఁదే సకలాచారము
నెరపిన కొలఁదే నిజకీర్తి
తిరము సేయుకొలఁదే ధర్మంబును
యిరవుగ నందుకు నెక్కుడు లేదు
చ. 3:
సేసినకొలఁదే చేకొను కర్మము
రోసిన కొలఁదే రుచివిరతి
ఆసల శ్రీవేంకటాధిపు శరణను
దాసుడే యెక్కుడు తప్పే లేదు