తాళ్ళపాక పదసాహిత్యం/రెండవ సంపుటం/రేకు 182
రేకు: 0182-01 సామంతం సం: 02-409 భగవద్గీత కీర్తనలు
పల్లవి:
సమబుద్ధే యిందరికి సర్వవేదసారము
సముఁడిందరికి హరి సాధన మోయయ్యా
చ. 1:
చీమకుఁ దనజన్మము చేరి సుఖమై తోఁచు
దోమకుఁ దనజన్మము దొడ్డసుఖము
ఆమనియీఁగకు సుఖ మాజన్మమై తోఁచు
యేమిటా నెక్కువసుఖ మెవ్వరి కేదయ్యా
చ. 2:
జంతురాసులకు నెల్లా జననము లొక్కటే
అంతటాను మరణము లవియొక్కటే
చెంత నాహారనిద్రలు స్త్రీసుఖా లొక్కటే
ఇంతటా నిందుకంటే నెవ్వ రేమి గట్టిరయ్యా
చ. 3:
ఇందులోన నెవ్వరైనానేమి శ్రీవేంకటపతి-
నందముగాఁ దలఁచిన దది సుఖము
యెందుఁ జూచిన నీతఁ డిందరిలో నంతరాత్మ
చందముగా నెవ్వరికి స్వతంత్ర మేదయ్యా
రేకు: 0182-02 బౌళి సం: 02-410 అధ్యాత్మ
పల్లవి:
కరుణానిధివి గాన కాచితేనేమో కాని
సరికి బేసికి నిన్ను జరయఁ జోటున్నదా
చ. 1:
కాయములోపలి నిన్నుఁ గని మని కొలువక
ఆయపుఁగర్మమె బ్రహ్మ మని వుంటిని
చీయని నాచేఁతకు నే సిగ్గువడుండుట గాక
ఆయమేమైనా నిన్ను నడుగఁ జోటున్నదా
చ. 2:
సకలచైతన్యుఁడవై సరి నాలో నుండఁగాను
వికటపు విషయాలవెంటఁ బారితి
వొకరు రక్షించఁగా వేరొకరిపాలైన నాకు
తుకతుకలేకాక దూరఁగఁ జోటున్నదా
చ. 3:
పట్టి శ్రీవేంకటగిరిఁ బ్రత్యక్షమై యుండఁగాను
ఇటు నటుపై వైకుంఠ మేల కోరేను
దిట్టనై నానేరమి నే తెలిసి నవ్వుట యింతే
ఇట్టె నీచిత్తము గాక యెంచఁగఁ జోటున్నదా
రేకు: 0182-03 శంకరాభరణం సం: 02-411 అధ్యాత్మ
పల్లవి:
ఇన్నిటా నొరయక యెఱు కేది
వెన్నుని కృపఁగా వెలసేది
చ. 1:
కోపము మతిలోఁ గుందినపుడువో
పాపము లన్నియుఁ బాసేది
తీపుల యాసలు దీరినపుడువో
తాపత్రయములు దలఁగేది
చ. 2:
ఘనకర్మంబులు గడచినపుడువో
వెనుకొను భవములు విడిచేది
మునుకొని యింద్రియములు వీడినఁబో
పనివడి విరక్తి బలిసేది
చ. 3:
ఆఁకటిరుచు లివి యణఁగినపుడువో
చేకొని సుఖమునుఁ జెందేది
యీకడ శ్రీవేంకటేశ్వరు శరణము
పైకొనిననుఁబో బదికేది
రేకు: 0182-03 సాళంగనాట సం: 02-412 శరణాగతి
పల్లవి:
సకలోపాసకులకు నందును సగుణంబే ప్రమాణము
సకలమునీంద్రులు పూజించే యీసాకారమె ప్రమాణము
చ. 1:
సగుణంబని నినుఁ గొందరు సరి నిర్గుణమని కొందరు
వగలఁ బెక్కుగతిఁ జదివిన కొలఁదుల వారికి వారే వాదింతురు
అగణితస్వతంత్రుఁడవు గాన అల వాల్మీకి ఇట్టిట్టనకే
అగు "నిర్గుణాయ గుణాత్మనే" యని ఆనతి ఇచ్చుటే ప్రమాణము
చ. 2:
సోహం బని కొందరు "దాసోహం" బని కొందరు
సాహసవృత్తుల రెండుదెరంగుల సకలవివేకులు భజింతురు
దేహధారియై "దాసోహం" బని తేరి శుకుఁడు మీలోఁ గలసె
సోహపుభావన సర్వజగత్తులఁ జూపినదే ప్రమాణము
చ. 3:
ఆరుశాస్త్రముల నారుమతంబుల నారుగర్మములనైనాను
యీరీతుల మిము శరణని కొలువక యెవ్వరి కుపాయము లేదు
నారదాదులగు భక్తు లిందరును నానాగతు లరసి చూచి
సారపు శ్రీవేంకటపతి మీకే శరణనుటే ప్రమాణము
రేకు: 0182-04 లలిత సం: 02-413 వైరాగ్య చింత
పల్లవి:
ఇల జాణతనము లిన్నిటికిఁ గలదు
తలఁపే కుళై తగిలీఁ గాని
చ. 1:
మఱవదు దేహము మహిఁ దన గుణములు
గుఱి నాహారము గొనునెపుడు
మఱవ నింద్రియములు మర్మ్శస్థలములు
మఱచితి నిను నేమరులో కాని
చ. 2:
చెదరదు కర్మము సేసినంతయును
పొదిగి జీవమును భోగించును
చెదరదు సంసారశీతలబంధము
మదిఁ జెదరెడి నామరులేకాని
చ. 3:
తొలఁగవు మాయలు తొడరి ప్రపంచము
కలవలెఁ బెనగొని కదిసీని
బలు శ్రీవేంకటపతికృపచే నాకు
తొలఁగె భవము లెటు దూరీనో మరులు
రేకు: 0182-05 మాళవి సం: 02-414 శరణాగతి
పల్లవి:
హరి నెఱఁగని జన్మ మది యేలా ఆ-
సరుస నాతఁడులేని చదువేలా
చ. 1:
దయదొలఁగినయట్టి తపమేలా
భయములేనియట్టి భక్తేలా
ప్రియముమానినయట్టి పెనఁగేలా మంచి-
క్రియావిరుద్ధపు కీర్తనలేలా
చ. 2:
ఫలములేనియట్టి పనులేలా కడుఁ
గలిమిలేనియట్టి గర్వమేలా
బలిమిలేనియట్టిపంతామేలా శౌరి-
దలఁచలేని యట్టితనువది యేలా
చ. 3:
తన కమరని దొరతనమేలా
చనవులేనియట్టి సలిగె యేలా
యెనలేని శ్రీవేంకటేశ్వరుని శరణని
మనఁగలిగినమీఁద మరి చింతలేలా