తాళ్ళపాక పదసాహిత్యం/మొదటి సంపుటం/రేకు 15
రేకు: 0015-01 ఆహిరి సం: 01-089 వైరాగ్య చింత
పల్లవి:
ఊరికిఁ బోయెడి వోతఁడ కడు-
చేరువతెరు వేఁగి చెలఁగుమీ
చ.1:
ఎడమతెరువువంక కేఁగిన దొంగలు
తొడిఁబడ గోకలు దోఁచేరు
కుడితెరువున కేఁగి కొట్టువడక మంచి-
నడిమితెరువుననే నడవుమీ
చ.2:
అడ్డపుఁ దెరువుల నటునిటుఁ జుట్టాలు
వెడ్డువెట్టుచు నిన్ను వేఁచేరు
గొడ్డేరేచిన్నదిడ్డితెరువు వోక
దొడ్డతెరువువంక తొలఁగుమీ
చ.3:
కొండతెరువు కేఁగి కొంచపుసుఖముల
బండై తిరుగుచు బడలేవు
అండనుండెడిపరమాత్ముని తిరుమల-
కొండతెరువు తేఁకువ నేఁగుమీ
రేకు: 0015-02 ఆహిరి సం: 01-090 వైరాగ్య చింత
పల్లవి:
అక్కడ నాపాట్లువడి యిక్కడ నీపాటు పడి
కుక్కనోరికళాసమై కొల్లఁబోయ బతుకు
చ.1:
ఎండచేత నీడచేత నెల్లవాఁడు నిట్లానే
బండుబండై యెందుఁ గడపల గానక
వుండగిలి నరకాల నుడుకబోయెద మింక
వండఁ దరిగినకూరవలెనాయ బతుకు
చ.2:
పంచమహపాతకాలబారిఁ బడి భవములఁ
దెంచి తెంచి ముడివేయ దీదీపులై
పొంచినయాసలవెంటఁ బొరలఁబోయెద మింక
దంచనున్న రోలిపిండితలఁపాయ బతుకు
చ.3:
యీదచేత వానచేత నెల్లవాఁడు బాయని-
బాదచేత మేలెల్ల బట్టబయలై
గాదిలివేంకటపతిఁ గానఁగఁబోయెద మింక
బీదగరచినబూరెప్రియమాయ బ్రదుకు
| పల్లవి : | నాఁటికి నాఁడే నా చదువు | |
| చ. 1: | ఎనయ నీతని నెఱుఁగుటకే పో | |
| చ. 2: | తెలిసి యితనినే తెలియుటకే పో | |
| చ. 3: | పరమని వేంకటపతిఁ గనుటకే పో | |
రేకు: 0015-04 నాట సం: 01-092 ఉత్సవ కీర్తనలు
పల్లవి: ఇటు గరుడని నీవెక్కినను
పటపట దిక్కులు బగ్గనఁ బగిలె
చ.1: ఎగసిన గరుడని యేపున 'ధా' యని
జిగిదొలఁక చబుకు చేసినను
నిగమాంతంబులు నిగమ సంఘములు
గగనము జగములు గడగడ వడఁకె
చ.2: బిరుసుగ గరుడని పేరెము దోలుచు
బెరసి నీవు కోపించినను
సరుస నఖిలములు జర్జరితములై
తిరుపున నలుగడ దిరదిరఁ దిరిగె
చ.3: పల్లించిన నీ పసిఁడి గరుడనిని
కెల్లున నీ వెక్కినయపుడు
ఝల్లనె రాక్షస సమితి నీ మహిమ
వెల్లి మునుఁగుదురు వేంకటరమణా
రేకు: 0015-05 నాదరామక్రియ సం: 01-093 భక్తి
పల్లవి:
ఈ సురలీ మునులీ చరాచరములు
యీ సకలమంతయు నిది యెవ్వరు
చ.1:
ఎన్నిక నామము లిటు నీవైయుండఁగ
యిన్నినామముల వారిది యెవ్వరు
వున్నచోటనే నీవు వుండుచుండఁగ మరి
యిన్నిటాఁ దిరుగు వారిది యెవ్వరు
చ.2:
వొక్కరూపై నీవు వుండుచుండఁగ మరి
తక్కిన యీరూపములు తా మెవ్వరు
యిక్కడనక్కడ నీవు యిటు ఆత్మలలోనుండ
మక్కువ నుండువారు మరి యెవ్వరు
చ.3:
శ్రీవేంకటాద్రిపై చెలఁగి నీవుండఁగా
దైవంబులనువారు తా మెవ్వరు
కావలిసినచోట కలిగి నీ వుండఁగ
యీవిశ్వపరిపూర్జు లిది యెవ్వరు
రెకు: 0015-06 లలిత సం; 01-094 అధ్యాత్మ
పల్లవి:
తాప లేక మేడ లెక్కఁదలఁచేము
యేపులేని చిత్తముతో యీహీహీ నేము
చ.1:
ఎఱుకమాలినబుద్ది యెవ్వరైనాఁ బతులంటా
తెఱఁగెఱఁగక వీధిఁ దిరిగేము
పఱచైన జవరాలు పరులెల్లా మగలంటా
వొఱపు నిలిపిన ట్లోహోహో నేము
చ.2:
యిందరును హితులంటా యెందైనా సుఖమంటా
పొందలేనిబాధఁ బొరలేము
మందమతిఁవాడు యెండమావులు చెరువులంటా
అందునిందుఁ దిరిగిన ట్లాహాహా నేము
చ.3:
మేటివేంకటేశుఁ బాసి మీఁదమీఁద జవులంటా
నాటకపు తెరువుల నడిచేము
గూటిలో దవ్వులవాఁడు కొండలెల్ల నునుపంటా
యేటవెట్టి యేఁగిన ట్లీహీహీ నేము