తాళ్ళపాక పదసాహిత్యం/మూడవ సంపుటం/రేకు 295
రేకు: 0295-01 తెలుగు కాంభోధి సం: 03-548 గురు వందన, నృసింహ
పల్లవి:
ఇందునే తుదిపద మెక్కి రిందరును
మందరధర నీ మహిమిదివో
చ. 1:
మరిగిన పుణ్యుల మతిలో కోరిక
పరమపు హరి నీ పాదములు
గరిమ గోపికలు గావలెనన్నది
హరి నీ సంభోగ మదియెపో
చ. 2:
పొంచి వేదములు పొగడెడి యర్థము
అంచెల గుణకథ లవి నీవి
పంచి యజ్ఞముల ఫలమై యున్నవి
నించి దేవ నీ నిజపూజలెపో
చ. 3:
కైవల్యమునకుఁ గడుఁ దెరువై నది
ఆవల నీ శరణాగతియే
శ్రీవేంకటేశ్వర చెప్పె మా గురుడు
మావద్ద నిదె నీ మంత్రమెపో
రేకు: 0295-02 సామంతం సం: 03-549 అధ్యాత్మ
పల్లవి:
గోవిందుదాసులమై కొన కెక్కుదుముఁ గాక
వేవేలు విధుల నమ్మి వెతఁబడఁగలమా
చ. 1:
మనసు లోపలి మామర్మము దెలియలేము
ఘనుఁడైన హరి నెట్టు గానఁగలము
తనువుతో భోగాలు తగులు వీఁడగలేము
వెనక కర్మపాశాలు వీడించుకోఁగలమా
చ. 2:
వడిఁ బెట్టే యింద్రియాల వద్దని మానుపలేము
తొడరి సంసారము తోయఁగలమా
బడిబడి నానాటి బతుకు చెప్పుకోలేము
పొడలేటి యితరుల బోధించఁగలమా
చ. 3:
కొంకక ఆడిన మాట గురుతు వెట్టఁగలేము
లంకె వేదవాక్యము దలఁచఁగలమా
యింకా శ్రీవేంకటేశుఁ డితఁడే మా దేవుఁడని
సంకెలేకుందుముఁ గాక జాలిఁబడఁగలమా
రేకు: 0295-03 బౌళి సం: 03-550 అద్వైతము
పల్లవి:
పుట్టుగులు నొక్కటే పుణ్యపాపములే వేరు
యెట్టుసేసినాఁ జేసీ నేమి సేయవచ్చును
చ. 1:
పగలే రేయి యీబడిఁ గొన్నిజీవులకు
వొగి నా రేయి పగలౌ నొకరికిని
తగుదైవ మొకఁడే తమ మతములే వేరు
పగటుల విష్ణుమాయ భ్రమయించీ నిదివో
చ. 2:
నిలువెల్లాఁ జేఁదే నెరిఁ గొన్నివృక్షములు
కలదెల్లఁ దీపే కమ్మరఁ గొన్ని
తలఁపును నొకటే తత్త్వములే వేరువేరు
చెలరేఁగి విష్ణుమాయ చిక్కువెట్టీ నిదివో
చ. 3:
ఇహమే పరము యెరిఁగితేఁ గొందరికి
మహిఁ బరమే ఇహము మరొకరికి
వహితో శ్రీవేంకటేశు వలెనని కొలిచితే
సహజపు విష్ణుమాయ జారిపోవునపుడే
రేకు: 0295-04 కన్నడగౌళ సం: 03-551 మాయ
పల్లవి:
దైవమా నీవే యిందు దయ దలఁచుటఁ గాక
తోవనున్న జీవులెట్లు తోసేరు నీమాయ
చ. 1:
పలుచవులందునెల్ల ప్రాణమే మిక్కిలి చవి
బలిమి తీపులలోనఁ బ్రాణమే తీపు
యిలపైఁ బూజ్యులలోన నింతులే కడుఁబూజ్యులు
తలఁచి జీవులు యెట్టు దాఁటేరు నీమాయ
చ. 2:
తగు చుట్టరికాలలో ధనమే చుట్టరికము
జగతిఁ గట్టని కట్టు సంసారము
వగలైన గుణాలలో వైరమే నిజగుణము
జిగిఁ బ్రాణులెట్లు గెలిచేరు నీమాయ
చ. 3:
తమలో నెవ్వరికైనా తమ జాతి తమ నేర్పు
తమకు నెక్కుడై తోఁచు తక్కువనరు
నెమకి శ్రీవేంకటేశ నీదాసులకే కాని
భ్రమసిన జీవులెల్లాఁ బాయరు నీమాయ
రేకు: 0295-05 లలిత సం: 03-552 విష్ణు కీర్తనం
పల్లవి:
తెలిసినవారి కింతా దేవుఁడై యుండు
కలఁడన్నచోట హరి గలఁ డటుగాన
చ. 1:
అందునిందుఁ బోయి శ్రీహరిని వెదకనేల
బొందితోడి రూపులెల్లాఁ బొరి నతఁడే
కొందరిలోనుండి ఇచ్చుఁ గోరినట్టి యీవులెల్ల
కొందరిలో మాటలాడుఁ గొందరిలో నగును
చ. 2:
లోన వెలిఁ జూచి పరలోకము వెదకనేల
యేనెలవైన వైకుంఠ మెదుట నదె
పూని వొకచోట నెండ పొడచూపు నక్కడవే
నానిన వెన్నెల గాసు నానారీతులౌను
చ. 3:
చొక్కిచొక్కి యానందసుఖము వెదకనేల
మక్కువఁ దా శాంతుఁడైతే మతిలో నదె
యెక్కువతో శ్రీవేంకటేశ్వరు దాఁసుడ నైతి
వొక్కఁడే మాకిన్నిటికిఁ నొడయఁడై నిలిచె
రేకు: 0295-06 బౌళి సం: 03-553 శరణాగతి
పల్లవి:
ఇంక మా బోంట్ల కేది విధో
కింకరులమనియెడి గెలుపే కాక
చ. 1:
యెవ్వరు గడచిరి యింతక తొలుతను
నివ్వటిల్లు హరి నీమాయ
నవ్వుచు నీ శరణాగతి నమ్మిన
మువ్వంక శుకాదిమునులే కాక
చ. 2:
కన్నవారెవ్వరు ఘన వైకుంఠము
వున్నతమగు నీ వురుమహిమ
మున్ను నిపుడు నీ ముద్రలు మోఁచిన
అన్నిటా ఘనసనకాదులుఁ గాక
చ. 3:
తెలియువారెవ్వరు దివ్యజ్ఞానము
చలనముగాఁ జెప్పు శాస్త్రములు
యిలలో శ్రీవేంకటేశ నీవారై
చెలఁగిరి శేషాదిజీవులుఁ గాక