తాళ్ళపాక పదసాహిత్యం/మూడవ సంపుటం/రేకు 232

by తాళ్ళపాక అన్నమాచార్యులు

రేకు: 0232-01 లలిత సం: 03-180 శరణాగతి

పల్లవి:

వెన్న చేతఁబట్టి నేయి వెదకనేలా
యిన్నిటా నెంచి చూచితే నిదియే వివేకము

చ. 1:

నీ దాసులున్నచోట నిత్యవైకుంఠ మిదె
వేదతో వేరొక చోట వెదకనేలా
ఆదిగొని వారిరూపు లవియే నీరూపులు
పోది నిన్ను మదిఁ దలపోయనేలా

చ. 2:

వారలతోడి మాటలు వడి వేదాంతపఠన
సారె వట్టిచదువులు చదువనేల
చేరి వారికరుణే నీ చేపట్టిన మన్ననలు
కోరి యింతకంటే మిమ్ముఁ గొసరనేలా

చ. 3:

నావిన్నపము నిదె నారదశుకాదులును
యీవిధముననే ఆనతిచ్చినారు
శ్రీవేంకటేశ నీవు చేపట్టిన దాసులకు
కైవశమౌ యీబుద్ధి కడమేలా

రేకు: 0232-02 దేవగాంధారి సం: 03-181 శరణాగతి

పల్లవి:

హీనుఁడైన నన్నుఁ దెచ్చి యింతగా మన్నించితివి
దానవారి నీవు సేసే తగవిట్టిదయ్యా

చ. 1:

విరతి బొందినయట్టి విమలచిత్తుఁడఁ గాను
ధరణి నెక్కుడయిన తపసిఁ గాను
అరుదుగ గెంటులేని ఆచారవంతుఁడఁ గాను
హరి నీకరుణ నాపై నంటుటెట్టయ్యా

చ. 2:

చేముంచి యిందరిలోన జితేంద్రియుఁడఁ గాను
భూమెల్లా దానమిచ్చిన పుణ్యుఁడఁ గాను
దోమటికర్మాలు సేసి తుదకెక్కేవాఁడఁ గాను
యేమిటికిఁ గాచితివో యిది సోద్యమయ్యా

చ. 3:

వివరించి తెలిసిన విజ్ఞాని తొలుతఁ గాను
తవిలి వీ భక్తిగల ధన్యుఁడఁ గాను
భవసాగరములోని ప్రాణిమాత్ర మింతే నేను
యివల శ్రీవేంకటేశ యెట్టేలితివయ్యా

రేకు: 0232-03 మంగళకౌశిక సం: 03-182 శరణాగతి

పల్లవి:

ఇదె నీ కన్నుల యెదిటికి వచ్చితి
కదియుచు నెట్టయినఁ గావకపోదు

చ. 1:

పరమపురుష నీ భక్తి దొరకకే
యిరవగు జన్మము లెత్తితిని
హరి నీ కరుణకు నరుహము లేకే
దురితవిదుల సందులఁ బడితి

చ. 2:

జగతీశ్వర నీశరణము లేకే
వొగి సంసారపువురిఁ బడితి
భగవంతుఁడ నీ పదములు గనకే
తెగని పాపముల తీదీపు లైతి

చ. 3:

గోవిందుఁడ నినుఁ గొలువఁగ నేరకే
ధావతి యాసలఁ దగిలితిని
శ్రీవేంకటేశ్వర చేరి నీవు నా-
దైవమవుగాఁగ ధన్యుఁడ నయితి

రేకు: 0232-04 దేసాళం సం: 03-183 గురు వందన

పల్లవి:

ఈతఁడే ముక్తిదోవ యీతఁడే మాయాచార్యుఁ
డీతఁడు గలుగఁబట్టి ఇందరు బదికిరి

చ. 1:

అదివో తాళ్లపాక అన్నమాచార్యులు
యిదె వీఁడె శ్రీవేంకటేశు నెదుట
వెదవెట్టి లోకములో వేదములన్నియు మంచి-
పదములుసేసి పాడి పావనము సేసెను

చ. 2:

అలరుచుఁ దాళ్లపాక అన్నమాచార్యులు
నిలిచి శ్రీవేంకటనిధియే తానై
కలిదోషములు వాప ఘనపురాణములెల్ల
పలుకుల నించినించి పాడినాఁడు హరిని

చ. 3:

అంగవించెఁ దాళ్లపాక అన్నమాచార్యులు
బంగారు శ్రీవేంకటేశు పాదములందు
రంగుమీర శ్రీవేంకట రమణుని యలమేలు-
మంగను యిద్దరిఁ బాడి మమ్ము గరుణించెను

రేకు: 0232-05 లలిత సం: 03-184 దశావతారములు

పల్లవి:

నేఁడు నీ మహిమ నెరపడి సమయము
వాఁడి మెరసి యిటు వరదుఁడ రావే

చ. 1:

అల చక్రపాణివై యసురల తల-
లిలఁ గూల్చిన జగదీశ్వరుఁడ
చలమున హిరణ్యుఁ జక్కాడి యిటు భూ-
వలయము నిలిపిన వరాహమా

చ. 2:

పంచల నీదాసు బఱచిన కశిపునిఁ
జించిన శ్రీనరసింహమా
యెంచి విభీషణు కిటు లంక యెసగి
కొంచని ప్రతాప కోదండరామా

చ. 3:

నరకాసురు నటు నఱకి కామినుల
సిరులఁ జెఱగొన్న శ్రీకృష్ణ
పొరిఁబొరి బలిచే భూదాన మడిగి
సిరి నిటు గూడిన శ్రీవేంకటేశా

రేకు: 0232-06 శంకరాభరణం సం: 03-185 అధ్యాత్మ

పల్లవి:

కని గుడ్డును నదె విని చెవుడును నిదె
ననిచి జగత్తు నడచీనదివో

చ. 1:

వుదయాస్తమయము లొకదినముననే
యెదుటనె వున్నవి యెంచినను
యిదివో జీవులు యెంచక తమతమ-
బ్రదుకులు సతమని భ్రమసెదరు

చ. 2:

వెలుఁగును జీఁకటి వెసఁ గనుఁగొనలనె
నిలిచీ నూరక నిమిషములో
కలవలెనుండిన గతి సంసారము
బలువుగ సతమని భ్రమసెదరు

చ. 3:

కాంతలుఁ బురుషులు కాయ మొక్కటనె
పొంతనే పుట్టుచుఁ బొదలెదరు
యింతయు శ్రీవేంకటేశ్వరు మహిమలఁ
పంతము దెలియక భ్రమసెదరు