తాళ్ళపాక పదసాహిత్యం/మూడవ సంపుటం/రేకు 202
రేకు: 0202-01 ఆహిరి సం: 03-007 అధ్యాత్మ
పల్లవి:
పూచిన యీ దేహము పువ్వుగాని పిందెగాని
చేచేత నెవ్వరికిఁ జెప్పనోపఁ బ్రియము
చ. 1:
పుట్టించిన దైవము పూరి మేపునా మమ్ముఁ
బట్టిన పూర్వకర్మము పాసిపాయ్యీనా
మెట్టిన సంసారము మెదిగిన పాటే చాలు
తొట్టి కన్నవారినెల్ల దూర నోప మిందుకు
చ. 2:
నొసలఁ వ్రాసిన వ్రాలు నుసిగితే మానీనా
కొసరి జగము నాకే కొత్తలయ్యీనా
వుసురుతోడి సుఖము వుండిన పాటే చాలు
కొసరి జన్మములింకాఁ గోరనోప నేను
చ. 3:
యేలినవాఁడు శ్రీహరి యేమి సేసినా మేలె
వేళతో నాతఁడే శ్రీవేంకటేశుఁడు
పాలించె నాతఁడు మమ్ము పదివేలులాగులను
యీలాగులనే సుఖిఇం(???)చేము నేము
రేకు: 0202-02 ధన్నాసి సం: 03-008 గురు వందన, నృసింహ
పల్లవి:
పుట్టినట్టె వున్నవాఁడ పోలేదు రాలేదు
ఇట్టె నీ దాసుఁడ నైతి యెంగిలెల్లఁ బాసె
చ. 1:
వెలినున్న జగమెల్ల విష్ణుఁడ నీ మహిమే
అలరి నాలోన నీవే అంతరాత్మవు
తెలిసి నేనున్నచోటే దివ్యవైకుంఠము
వెలలేని నరకముల వెరపెల్లఁ దీరె
చ. 2:
తనువుతో నుండేది నీ తలఁచిన తలఁపేనా
మనుపు సంసారము నీమాయ చేతిదే
పనులనా కర్మము నీ పంచినట్టి పనుపే
మనసు లోపలి యనుమానమెల్లఁ బాసె
చ. 3:
తెరమరుగు దినాలు దేవుఁడ నీ కల్పితమే
సొరిది యీ సురలెల్ల చుట్టాలే నాకు
నిరతి శ్రీవేంకటేశ నీమరఁగు చొచ్చి నేఁడు
గురుని యానతిచేతఁ గొంకులెల్లా బాసె
రేకు: 0202-03 వరాళి సం: 03-009 వైరాగ్య చింత
పల్లవి:
ఐనదయ్యీఁ గానిదెల్లా నటు గాకుండితే మానీ
మానుపరాదివి హరి మాయామహిమలు
చ. 1:
పుట్టేటివెన్ని లేవు పోయేటివెన్ని లేవు
వెట్టి దేహాలు మోచిన వెడజీవులు
గట్టిగాఁ దెలుసుకొంటే కలలోనివంటి దింతే
పట్టి ఇందుకుఁగా నేల బడలేమో నేము
చ. 2:
కడచినవెన్ని లేవు కాచుకున్నవెన్ని లేవు
సుడిగొన్న తనలోని సుఖదుఃఖాలు
యెడపుల నివి రెండు యెండనీడవంటి వింతే
కడనుండి నేమేల కరఁగేమో నేము
చ. 3:
కోరినవియెన్ని లేవు కోరఁగలవెన్ని లేవు
తీరని సంపదలతో తెందేపలు
ధారుణి శ్రీవేంకటేశు దాసులమై యిన్నియును
చేరి కైకొంటిమి యేమి సేసేమో నేము
రేకు: 0202-04 సాళంగం సం: 03-010 భక్తి
పల్లవి:
భక్తసులభుఁడును పరతంత్రుఁడు హరి
యుక్తిసాధ్య మిదె యొకరికీఁ గాఁడు
చ. 1:
నినుపగు లోకముల నిండిన విష్ణుఁడు
మనుజుఁడ నాలో మనికియయ్యె
మునుకొని వేదముల ముడిగిన మంత్రము
కొననాలికలలోఁ గుదురై నిలిచె
చ. 2:
యెలమి దేవతల నేలిన దేవుఁడు
నలుగడఁ నధముని నను నేలె
బలుపగు లక్ష్మీపతి యగు శ్రీహరి
యిల మా యింటను యిదివో నిలిచె
చ. 3:
పొడవుకుఁ బొడవగు పురుషోత్తముఁడిదె
బుడిబుడి మా చేతఁ బూజ గొనె
విడువ కిదివో శ్రీవేంకటేశ్వరుఁడు
బడి వాయఁడు మా పాలిట నిలిచి
రేకు: 0202-05 లలిత సం: 03-011 అధ్యాత్మ
పల్లవి:
జ్ఞానినైనా నీకుఁ బో దజ్ఞానినైనా నీకు బోదు
నేను చేసిన నేరమి నీకే సెలవయ్యా
చ. 1:
గరిమ మా పుట్టుగు నీ గర్భవాసములోనే
అరయ మా మోక్షము నీ యరచేతిదే
వెరవు లెంచుకోఁబోతే వేరే మాకు గతి లేదు
నిరతి మా బదుకులు నీకు సెలవయ్యా
చ. 2:
నిండిన మా కోరికలు నీ పెర రేఁపులే
వుండఁ జోటు నీకు నా వుల్లములోనే
చండి పెట్టి మాకైతే స్వతంత్ర మించుకా లేదు
నిండిన మా చేఁతలెల్లా నీకే సెలవయ్యా
చ. 3:
యిదె మా సంసారములు యిట్టె నీ కల్పితములు
తుదమొదలును నీవే తోడునీడవు
యెదుట శ్రీవేంకటేశ యేలిన వాఁడవు నీవే
నిదుర మా దినములు నీకే సెలవయ్యా
రేకు: 0202-06 సాళంగనాట సం: 03-012 వైష్ణవ భక్తి
పల్లవి:
ఎక్కడి నరకములు యెక్కడి మృత్యువు మాకు
దక్కి నీ దివ్యనామామృతము చూరగొంటిమి
చ. 1:
తమితో శ్రీపతి నీ దాసులఁ జేరినప్పుడే
యమకింకర భయము లణఁగిపోయ
జమళి నీ యాయుధలాంఛనము మోచినప్పుడే
అమరఁ గాలదండము లవియెల్లఁ బొలిసె
చ. 2:
మును నీ నగరిత్రోవ మొగమైన యప్పుడే
ఘనయామ్య మార్గము గట్టు వడియ
వొనర నీ తిరుపతి నొకరాత్రి వున్నపుడే
కనలు కాలసూత్రాది ఘాతలెల్లఁ బూడె
చ. 3:
యెడరై నీ మంత్రజప మెంచుకొన్న యపుడే
కడుఁ జిత్రగుప్తుని లెక్కలు గడచె
వడిగా శ్రీవేంకటేశ్వర మీ శరణనఁగా
అడరి వైకుంఠము మాయరచేత నిలిచె