తాళ్ళపాక పదసాహిత్యం/నాలుగవ సంపుటం/రేకు 375

by తాళ్ళపాక అన్నమాచార్యులు

రేకు: 0375-01 బౌళి సం: 04-437 వైరాగ్య చింత

పల్లవి:

ఎప్పటిజీవుఁడే యెప్పటిజగమే యెంతగాలమును నీరీతే
కప్పుకవచ్చితి వనాదినుండియు కర్మమ యింకా వేసరవా

చ. 1:

మఱచితివా తొలుజన్మంబుల మరణకాలములదుఃఖపుబాట్లు
మఱచితివా యమకింకరులయి మర్దించిన బహుతాడనలు
మఱచితివా నరకకూపముల మాఁటికి మాఁటికిఁ బరచిన బాధలు
మఱియును సుఖమని భవమే కోరెదు మనసా ముందరగానవుగా

చ. 2:

తలఁచవుగా జననకాలమునఁదనువిదియే యిటుపుట్టిన రోఁతలు
తలఁచవుగా బాల్యంబునఁ దల్లితండ్రుల శిక్షలు వ్యాథులును
తలఁచవుగా సంసారమునకును దైన్యంబును యాచించెటి యలమట
తలఁపుననిదియే వలెనని వోమెదు తనువా యింకా రోయవుగా

చ. 3:

కంటివిగా మలమూత్రాదుల కడుగఁగఁ దీరని దినదినగండము
కంటివిగా కనురెప్పలనే కాలముగడచేటికడత్రోవ
కంటివిగా శ్రీవేంకటపతి కరుణచేత నీ వివేకభావము
అంటి యిటువలెనె సార్వకాలమును అంతరాత్మ నినుఁదలఁచగా

రేకు: 0375-02 లలిత సం: 04-438 గురు వందన, నృసింహ

పల్లవి:

అన్నిమంత్రములు నిందే యావహించెను
వెన్నతో నాకుఁ గలిగె వేంకటేశు మంత్రము

చ. 1:

నారదుండు జపియించె నారాయణ మంత్రము
చేరెఁ బ్రహ్లాదుఁడు నారసింహ మంత్రము
కోరి విభిషణుఁడు చేకొనె రామమంత్రము
వేరె నాకుఁగలిగె వేంకటేశు మంత్రము

చ. 2:

రంగగు వాసుదేవ మంత్రము ధ్రువుఁడు జపించె
నంగవించెఁ గృష్ణమంత్ర మర్జునుఁడును
ముంగిట విష్ణుమంత్రము మొగి శుకుఁడు పఠించె
వింగడమై నాకు నబ్బె వేంకటేశు మంత్రము

చ. 3:

యిన్ని మంత్రములకెల్ల యిందిరా నాథుఁడే గురి
పన్నినదిదియే పర బ్రహ్మమంత్రము
నన్నుఁ గావఁ కలిగెఁబో నాకు గురుఁడియ్యఁగాను
వెన్నెలవంటిది శ్రీ వేంకటేశు మంత్రము

రేకు: 0375-03 వరాళి సం: 04-439 వైరాగ్య చింత

పల్లవి:

హరిఁ గొలిచినఁగాని ఆపద లణఁగవని
యెరఁగక పొరలితి మిందేమి నిజము

చ. 1:

పుట్టిన దేహమొకటి పొందిన వికారాలఁ
బట్టైన జీవుఁడొకఁడు ప్రాణములేడు
కట్టిడి చిత్తమొకటి కరణములైతేఁ బది
యిట్టిదివో మాజన్మ మిందేది నిజము

చ. 2:

మొదలి ప్రకృతొకటి ముంచిన గుణాలు మూఁడు
కదియు మోహ మొకటి కర్మాలు పెక్కు
పొదలుఁగర్మ మొకటి భోగా లనంతములు
యిదివో మా జన్మ మెంచ మిందేది నిజము

చ. 3:

అంతరాత్మ శ్రీ వేంకటాద్రీశు డొక్కఁడే
చింతించ జీవులైతే సేనాసేన
అంతలో నీతని శరణని బ్రతికితిఁగాక
యెంతలేదు మాజన్మ మిందేది నిజము

రేకు: 0375-04 ముఖారి సం: 04-440 శరణాగతి

పల్లవి:

ఇదివో తెరమరఁ గిహ పరములకును
వెదకి కన్నమీదఁ విచారమేలా

చ. 1:

హరికుక్షిగతమే యఖిలలోకములెల్ల
నరకము స్వర్గమన్న నయమెంచనేలా
యిరవై యుండినచోనే యిటు హరిదాసుఁడైతే
పరమ పదము నదే భ్రమయఁగనేలా

చ. 2:

అందిరి లోపల హరి యంతరాత్ముఁడై యుండ
యిందును నరసురలని యెంచఁగనేలా
అందిన మనసులో హరి భక్తి గలిగిన-
నందునే మోక్షము దప్ప దనుమానమేలా

చ. 3:

ఘటన శ్రీ వేంకటేశుక ల్పితమై జన్మములు
యిటు సుఖదుఃఖములు యెంచుకొంటేలా
సటలేక యాతని శరణము చొచ్చితేనే
పటు జీవన్ముక్తి యదే పలు మాటలేలా

రేకు: 0375-05 దేశి సం: 04-441 విష్ణు కీర్తనం

పల్లవి:

హరి నీవే సర్వాత్మకుఁడవు
యిరవగు భావన యియ్యఁగదే

చ. 1:

చూడక మానవు చూచేటి కన్నులు
యేడనేవైనా యితరములు
నీడల నింతా నీ రూపములని
యీడువడని తెలి వియ్యఁగదే

చ. 2:

పారక మానదు పాపపు మన సిది
యీరసములతో నెందైనా
నీరజాక్ష యిది నీమయమేయని
యీరీతుల తలఁ పియ్యఁ గదే

చ. 3:

కలుగక మానవు కాయపు సుఖములు
యిల లోపలఁ గల వెన్నైనా
అలరిన శ్రీ వేంకటాధిప నీకే
యిలనర్పితమను యహ మియ్యఁగదే