తాళ్ళపాక పదసాహిత్యం/నాలుగవ సంపుటం/రేకు 370

by తాళ్ళపాక అన్నమాచార్యులు

రేకు: 0370-01 దేవగాంధారి సం: 04-410 శరణాగతి

పల్లవి:

ఇందుకు ధ్రువాదు లిటు సాక్షి
చెంది నమ్మవో జీవుఁడ నీవు

చ. 1:

కొండలవంటివి ఘోరపాపములు
ఖండించును హరి ఘన నామ జపము
నిండించును మతి నిత్యానందము
పండించునపుడె పరమపదంబు

చ. 2:

జలధులవంటివి జననబంధములు
తొలఁగించును హరితూరిన భక్తిది
వెలిఁగించును ఘన విజ్ఞానంబులు
చెలఁగించును బహు సిరిసంపదలు

చ. 3:

తోవరాని బహుదుఃఖము లణఁచును
శ్రీ వేంకటపతిఁ జేరిన శరణము
పావనంబుగాఁ బచరించు గుణము
కైవశమగు లోకములెల్లాను

రేకు: 0370-02 భూపాళం సం: 04-411 శరణాగతి

పల్లవి:

చిక్కవద్దు చొక్కవద్దు సిలుగుఁ బ్రపంచముల
తక్కిన భోగములెల్లా దైవమే యెరుఁగు

చ. 1:

అంతరంగమునఁ దాను హరిఁ దలఁచినఁ జాలు
అంతటి మీఁదటి పనులాతఁ డెరుగు
పంతమున నాతనిపై భారము వేసినఁ జాలు
వింత వుద్యోగములు గోవిందుఁడే యెరుఁగు

చ. 2:

చేకొని యాతనిరూపు సేవించినఁ జాలు
ఆకడి యీకడి కర్మా లాతఁ డెరుఁగు
తేఁకువ నచ్యుతభక్తి తిరమయ్యినఁ జాలు
దీకొని పరము చూప దేవుఁడే యెరుఁగు

చ. 3:

సాధించి మాధవుని శరణుచొచ్చినఁ జాలు
ఆదియు నంత్యములెల్లా నాతఁ డెరుఁగు
పోదియై శ్రీ వేంకటేశుఁ బూజించినఁ జాలు
పాదుకొని రక్షించఁ బరమాత్ముఁ డెరుఁగు

రేకు: 0370-03 లలిత సం: ౦4-412 మనసా

పల్లవి:

మఱచితిమంటే మరిలేదు
తఱితోఁ దలఁచవో దైవపు మనసా

చ. 1:

పుట్టుచు నున్నది పోవుచు నున్నది
పట్టపు జీవుల ప్రపంచము
నట్టనడుమనే నరహరినామము
గుట్టున దలఁచవో గొనకొని మనసా

చ. 2:

పొద్దు వొడుచునదె పొద్దు గుంకునదె
తిద్దిన జగముల దినదినము
అద్దపు నీడల యంతర్యామిని
వొద్దనె తలఁచెనొనరవొ మనసా

చ. 3:

లోపల వెలుపల లోఁగొనివున్నది
శ్రీపతి మహిమల సృష్టియిదే
యేపున శ్రీ వేంకటేశ్వరుఁ డితఁడే
దాపని నమ్ముచుఁ దలఁచవో మనసా

రేకు: 0370-04 సామంతం సం: 04-413 హనుమ

పల్లవి:

చెల్లె నీచేఁతలు నీకే చేరి మేడెగుడిదిన్న
నల్లదె కంటిమి నిన్ను హనుమంతురాయ

చ. 1:

జంగ చాఁచినట్టి నీ సంగడి పాదములు
చెంగలించి యెత్తిన నీ శ్రీహస్తము
ముంగలిఁ బిడికిలించి మొలఁజేర్చినచేయి
అంగమాయ నీ సొబగు హమమంతరాయ

చ. 2:

పెరిగినవాలము పెద్దైన పిరుఁదును
అరిగి జలధి దాఁటే యాయితమును
సిరుల బంగారు కాసె చెలఁగిన సింగారము
అరుదాయ నీవునికి హనుమంతరాయ

చ. 3:

స్వామి కార్యపుఁ జింత జానికి సేమపువార్త
దీమసాన మగుడి యేతెంచిన చేఁత
రామ నామ జపముతో రతి శ్రీ వేంకటపతి-
కా మేటి బంటవైతివి హనుమంతరాయ

రేకు: 0370-05 లలిత సం: 04-414 గురు వందన, నృసింహ

పల్లవి:

నేనై విడువవద్దు తానై తగులవద్దు
తానే తానై వుంటేఁ దగులెల్ల నూడు

చ. 1:

పొద్దు వొద్దు హరిఁ దలఁపున దలపోయఁగ
వొద్దికైన పలుచేత లున్న వెల్లా మరచును
నిద్దిరించువాని చేత నిమ్మ పంటివలెనే
బుద్దితోఁ గర్మములు గొబ్బున జారిపోవును

చ. 2:

పలుమారు గురుసేవఁ బరగఁగా బరగఁగా
చలివాసి యాత్మవిజ్ఞానముఁ బొడచూపు
కలగన్నవాఁడు మేలుకనిన కలవలెనే
పలుసంసారములెల్ల భావనలై యుండును

చ. 3:

పక్కన శ్రీ వేంకటేశుపై భక్తి వొడమఁగా
అక్కజపు టిహపరా లరచేతివి యౌను
చొక్కపు పరుసమంటి సొంపుగానిలోహము
నిక్కఁ బైఁడైనట్టు నెరుసెల్లఁ దొలఁగును

రేకు: 0370-06 శంకరాభరణం సం: 04-415 నృసింహ

పల్లవి:

పరగీనదివో గద్దెపై సింహము వాఁడె
పరమైన యౌభళ నారసింహము

చ. 1:

తెల్లని మేని సింహము దేవ సింహము
మెల్లని చిరునవ్వుల మేటిసింహము
చల్లేటియూరుపులతో జయసింహము వాఁడె
బల్లిదుఁడై వెలసే యౌభళ నారసింహము

చ. 2:

నిలుచున్నసింహము నిత్యసింహము
అలరుఁ గొండలమీఁది యాదిసింహము
వెలుపలి కడపపై వీరసింహము
పలుకుఁ బంతము (ల) యౌభళనారసింహము

చ. 3:

పుట్టుజడలసింహము పూర్ణసింహము
ఱట్టడి యార్పుల యాఱడిసింహము
జట్టి గొన్న దాసులకు శాంత సింహము
పట్టపు శ్రీ వేంకటయౌభళ నారసింహము